کابل ټکى کام (جمعه، ۳۱ لړم ، ١٣٩٨ل)
امریکایي ولسمشر ډونلډ ټرمپ له امریکایۍ فاکس نیوز خبري شبکې سره په یوه تازه مرکه کې ویلي چې طالبانو سره پر یوې نوې هوکړې کار کوي.
ولسمشر ټرمپ زیاته کړې، تېر ځل هم دوی هوکړې ته نژدې شوي وو، خو طالبانو بریدونه وکړل، امریکایي ځواکونه یې ووژل او له همدې کبله هغه مهال هوکړه ونشوه.
ولسمشر ټرمپ همدا راز ویلي، دی د سولې لپاره کار کوي او په افغانستان کې د خپلو پوځیانو شمېر به کموي. نوموړي ویلي، په سوریه کې یې هم د امریکایي پوځیانو شمېر کم کړی، خو د تېلو سیمې یې خوندي کړې دي.
ټرمپ وایي”موږ افغانستان کې د خپلو پوځیانو شمېر کموو. له طالبانو سره پر یوې هوکړې کار کوو. ګورو چې څه کېږي. تېر ځل چې کله هوکړې ته نژدې شوو نو طالبانو فکر وکړ چې د دوی خونړۍ حملې ښه خبره ده.
دده په خبره، طالبانو فکر کاوه چې په دې کار سره به دوی وکړای شي چې له پیاوړي دریځه مذاکرات وکړي.
ټرمپ تیره شپه اشرف غني سره تلیفوني خبرې کړې وې، دواړو په سوله او نورو مهمو موضوعاتو ۲۵ دقیقې بحث کړی وو.
له دې خبرو وروسته ارګ له پخوانۍ سختدریزۍ لوېدلی دی، د ارګ ویاند صدیق صدیقي ویلي چې دسولې لپاره هر راز قربانۍ او سختو پرېکړو ته تیار دی.
سیاسي کارپوهانو لا له وړاندې خبرداری ورکړی وو چې امریکا بغیر له سیاسي جوړجاړي بل هیڅ لار نه لري او ژر ده چې بیرته مذاکراتي میز ته راوګرځي.
