کابل ټکی کام (چهارشنبه، ۶ ليندۍ، ۱۳۹۸ل)
پاکستان کې د اپوزيسيون ګوندونو په یوې ګډې مطبوعاتي غونډه کې غوښتنه کړیده چې له بحران څخه د هيواد د راوستلو یواځینۍ لاره له وخت وړاندې ټاکنې دي.
له هغه وروسته چې سترې محکمې د پوځ د لوی درستیز د کاري مودې د غځولو په اړه د صدراعظم امر وځنډاوه، اپوزيسيون ګوندونو دا غوښتنه مطرح کړې ده.
د جمعیت العلما اسلام گوند مشر مولانا فضل الرحمان مطبوعاتي غونډې ته وویل: ” ټول سیاسي گوندونه د عمران خان استعفا او د پوځ د مداخلې نه پرته د بیا ټاکنو غوښتنه کوي.
د پاکستان د پیپلز گوند مشر بلاول بهټو په خبره:” عمران خان ولس نه دې ټاکلی. مونږ د بل چا لخوا د ټاکل شوي کس صدراعظمي نه منو. موږ بيا پاک او شفاف انتخابات غواړو.”
د یادونې وړ ده چې دا په تاریخ کې لومړی ځل دی چې ستره محکمه د پاکستاني پوځ د مشر د کارې مودې د تمدید په اړه د لومړي وزیر پریکړه ځنډوي.
