(کابل ټکی کام، ۱۳۹۸ ليندۍ ۷، پنجشنبه)
د افغانستان د بشري حقونو د کمېسيون کمېشنر او وياند شکرالله مشکور وايي، اولسمشر غني د لوګر ښوونځيو کې د جنسي ځورونو قضيه دغه کمېسيون او لويې څارنوالۍ ته سپارلې ده.
د مشکور په وينا، ښه به دا وي چې په دغه قضيه کې د مدني ټولنو استازي، د پوهنې وزارت او د ملي شورا د بشري حقونو د کمېسيون استازي دې هم ورشامل شي.
څو ورځې مخکې د موسی محمودي او احسان الله حميدي په نوم دوه تنو فعالانو د لوګر ښوونځيو کې د جنسي تيريو مسئله راپورته کړه چې وروسته دغه تنه ته په کابل کې د اروپايي ټولنې له سفير سره د کتنې لپاره پر لاره و چې د ملي امنيت له خوا ونيول شول.
ملي امنيت د یادو فعالانو هغه ويډيوګانې رسنيو ته ليږلي چې دواړو پکې خپل راپور نيمګړی او له تيروتنو ډک بللی دی.
تر اوسه معلومه نه ده چې دغه اعتراف له يادو فعالانو په کوم حالت کې اخيستل شوی خود بښنې نړیوال سازمان او په کابل کې د امریکا سفیر ملي امنیت باندې نیوکه کړې چې له مدني فعالانو یې په زور تحقیقات کړي او د يادې ادارې تکتيکونه يې د شوروي اتحاد له تکتيکونو سره ورته بللي دي.
