غورځنګ
امریکا افغانستان اشغال کړی او لا تر اوسه هم دلته نظامي حضور لري.
دا چې د ملګرو ملتونو په نامه نړيواله اداره د دې لپاره جوړه شوې چې بې له کوم مذهبي، سمتي، ژبني او نورو تعصبونو څخه د ټولې نړۍ د هېوادونو امنيت وساتي او دغه منشور د مختلفو هېوادونو مشرانو دغه تړون لاسليک کړ، په دغه تړون کې اسلامي هېوادونو هم خپلو حالاتو ته په کتو سره ګډون وکړ، خو بیا هم د ملګرو ملتونو اداره له دومره ستر او درانه شعار او دعوې سره سره پر افغانستان د امريکا يرغل نه يوازې دا چې نه يې غندي، بلکې ملاتړ يې هم کوي او د تداوم لپاره يې مختلفې بهانې برابروي.
ملګري ملتونه په ډېره سپين سترګۍ سره په افغانستان کې پر امريکايي جناياتو سترګې پټوي او همدغه دامريکايانو او يا هم داخلي غلامانو له لوري کړل شوي جنايات بيا په پوره بې شرمۍ سره په طالبانو ورتپي.
د ملګرو ملتونو دغه ډول اعمال جوتوي چې پخوانی شعار يې پالتو، بې ځايه او يوازې د ويلو په بڼه دی، هيڅ عملي جنبه نه لري.
امريکا چې له کومه وخته پر افغانستان يرغل کړی دی له هماغه وخته يې په طالبانو پسې پروپاګند هم پيل کړی دی او هڅه کوي چې طالبان له هره اړخه وځپي.
خو طالبان بيا له هغه وخته چې په قطر کې يې خپل سياسي دفتر پرانيستی، له سيمه اييزو او نړيوالو هېوادونو سره پر اړيکو جوړولو بوخت دي او لا تر اوسه يې خپله برحقه سياسي داعيه هم د ډېرو نړيوالو او سيمه اييزو خلکو تر غوږونو رسولې، طالبان په خورا مهارت سره خپله داعيه پر مخ بيايي او وخت پر وخت خپل هغه مخالفين چې د طالبانو په اړه يې ناسم نظر او رائيه درلوده؛ په دې قانع کوي چې مبارزه او جنګ يې له خپلو اسلامي اساساتو او خپلو ملي دودونو او عنعناتو څخه د دفاع په خاطر ده، نه دا چې نړۍ ته ګواښ او يا هم سيمه اييزو هېوادونو ته خطر پېښوي.
که څه هم زياتره هېوادونه اوس د طالبانو پر حقانيت او برحقتوب قائل دي خو امريکا لا هم په دې هڅو کې ده چې طالبان د نړيوالو په سترګو کې ترهګر او يوه نړيواله ترورستي ډله معرفي کړي.
خو د امریکا دغه هڅې له لومړيو هغو سره خورا ماهرانه توپير لري، مخکې به امريکايانو د طالبانو پر وړاندې يوازې دا ويل چې د پاکستان خلک دي او يا هم د سيمه اييزو هېوادونو استخباراتي ډله ده، خو کله چې د امریکا دغه درواغجنه داعيه د ثبوت تر حده ونه رسېده نو يې همدا ډول هڅې په بله بڼه پيل کړې.
داسې چې د سولې د خبرو اترو پر مهال هم امريکايانو له طالبانو څخه غوښتي وو چې يوه امريکايي اډه په افغانستان کې ومني مګر طالبانو ورسره د يوه امريکايي عسکر پاتې کېدل هم نه دي منلي، ځکه نو اوس امریکا غواړي د خپلو تېرو اتلس کلنو خواريو او مصارفو څخه يو څه لاسته راوړي او هغه دا چې اوس يې خپلو داخلي او بهرنيو ويندويانو او پروپاګندو والا ته امر کړی چې د طالبانو د بدنامولو او امريکايي اشغال د تداوم لپاره دا ځل د طالبانو په ليکو کې د بهرنيو مسلمانانو د شتون اوازې او پروپاګندې خپرې کړي، چې د دې پواسطه به طالبان يو ځل بيا د نړيوالو او سيمه اييزو هېوادونو تر نيوکو لاندې راشي او ان هغه هېوادونه چې اوس طالبانو ايله په دې قانع کړل چې دوی د چا په داخلي چارو کې کار نه لري بلکې د متقابل احترام او درناوي په اصل به له هر هېواد سره معامله کوي؛ هم د طالبانو پر خلاف دريځ خپل کړي او طالبان به يوه داسې ډله وبولي چې نړيوال امنيت ته ګواښوونکي وي. او امريکايان به د نړۍ د ساتونکو په نامه ونومول شي نو په دې واسطه به داشغال او امريکا نظامي شتون ته لاره پرانيستل شي.
خو طالبان هم لکه څنګه يې چې امریکا په نظامي ډګر کې په ګونډو کړه، د مذاکراتو په مېز يې هم داعيه ورڅخه وګټله نو د امريکا دا د اوازو او پروپاګندو دسيسه به هم له ناکامۍ سره مخ کړي.
