لېکنه: سلطان محمد “ثاقب”
له ډېره وخته په سوشل ميډيا کې وينو او اورو چې له امریکايانو سره د طالبانو روانو مذاکراتو ته یوازې د سولې نوم ورکول سهي نه دي دوى وايي؛ ځکه چې دلته جګړه د هیواد د ازادۍ، د شیطان او رحمان لښکرو ترمنځ ده او موږ پرې زرګونه د سر سړي ورکړي، موږ دې سپېڅلې جګړې ته د ازادۍ جنګ او مقدس جهاد وایو او سوله هغه وخت وي چې څوک د هیواد اشغال ته اشغال نه وايي.
زما په فکر دا يوه خطا نظريه ده؛ ځکه چې امريکا د کوم مقصد لپاره افغانستان ته راغلې وه، هغه هر چا ته معلوم ده دا چې ياد مقصد يې ولې لاس ته را نه وړ، د اسلامي امارت تر واک لاندې د سپېڅلې مبارزې برکت و، چې د امريکا ټوله ستراتيژي چې د افغانستان لپاره يې له ځان سره راوړې وه، له خاورو سره خاورې شوه، که جهاد نه وى قرباني نه وى، استشهادي بريدونه نه وى، ممبر او سنګر نه وى، د حق پرستو عالمانو مبارزه نه وى، د مدرسينو مجاهدينو ته په مدرسو کې روحاني تربيت نه وى، د مشرانو بصيرت، سياسي تدبر او قرباني نه وى، سالمه رهبري او اداره نه وى، د کونډو او يتيانو صبر، حوصله او دعاګانۍ نه وى، د مجاهد ولس هر ډول قرباني نه وى، او بالآخره داچې د الله تعالی مرسته نه وی
آيا د وخت دجّاله او مکّاره امريکا به اوس د يوې چانټې لرونکي مجاهد سره داسې سر ټيټې د مذاکراتو ميز ته ناسته وه؟
ذَٰلِكَ فَضْلُ اللَّهِ يُؤْتِيهِ مَن يَشَاءُ وَاللَّهُ وَاسِعٌ عَلِيمٌ.(54) المائدة
دا ښکاره حقيقت دى چې د دغو قربانيو برکت و چې امريکا ذليله او د کلونو کلونو شوم پلانونه يې له خاورو سره خاورې شول “الحمدلله” او په دې هم کلک يقين لرو چې الله تعالى به د دغو قربانيو په نتيجه کې فتحه راولي که د سولې له لارې وي او که له بلې لارې.
د افغانستان خاوره اشغال ده، جګړه د افغانستان پر ولس تپل شوې ده او پر مقابل کې يې د اسلامي امارت تر قيادت لاندې د افغان ولس روانه جګړه له خپل سپيڅلي حريم څخه دفاع او د الله تعالى په لار کې يو ستر عبادت جهاد دى.
فتحه په کومو طریقو لاس ته راوړی شو؟
موږ په افغانستان کې دوه ډوله فتحه لاسته راوړلى شو لومړی: د نظامي قوت په توسط او بل د سياست او بصیرت له لارې چې دا فتحه به د سولې او مذاکراتو له لارې منځ ته راځي.
موږ که تاريخ مطالعه کړو دا به راته معلوم شي چې په اسلام کې داسې صلحې تېرې شوې دي! د عالمانو لخوا د فتحې په نوم نومول شوي چې يوه بېلګه يې “حديبې صلحه” ده دکتور علامه وهبة الزحيلي “رحمه الله” وايي: د (انّا فتحنا لک فتحًا مبينًا) په دې آيت کې له دې فتحې نه د حديبې د صلحې فتحه مراد ده، دا د جمهورو عالمانو وينا هم ده، همدارنګه علامه قرطبي “رحمه الله” د حديبې صلحې ته فتحه ويلې ده.
د افغانستان اسلامي امارت له خوا د امريکا متحد ايالاتو سره روان مذاکرات د صلحې حديبې سره له يو طرف زيات ورته والى لري او بل طرف ته بيا توپير هم لري.
ورته والى دا دى لکه څنګه چې د صلحې حديبې پر وخت مسلمانانو څومره سولې ته اړتيا لرله، نن هم ورته اړتيا لیدل کیږي، څومره ګټې چې په صلحې حديبیې کې مسلمانانو ته معلومېدلې ، نن هم هغه ګټې ښکاره او معلومې دي.
توپير يې دا دى چې په صلحه حديبيې کې کافران ، مشرکان پر خپل ځاى پاتي شول، دلته چې کومه سوله کيږي کافران به د ګران افغانستان له خاورې وځي چې همدا ټکى يې د اشغال د خاتمې په معنا دى.
هر کله چې د عالمانو په آند د حديبيې صلحه د فتحې په نوم ياده کړې ده ؛ نو د اسلام تر چتر لاندې د افغانستان اسلامي امارت له امريکا سره روانه سوله؛ خو په طريقه يې اولى سره اسلامي فتحه دى؛ ځکه خو مشر تابه هم عملياتو لپاره د (الفتح جهادي عملياتو) نوم کېښود او الله تعالى به ان شاء الله د نظامي قوت او يا سياسي قوت په توسط سره حق پلوه ډله کاميابه وي او بس.
