کابل ټکی کام (جمعه، ۲۲ ليندۍ، ۱۳۹۸ل)
د امريکا د دفاع وزارت ‘پنټاګون’ چارواکي وايي، امريکا د افغانستان د اتلس کلنې جګړې د پای ته رسولو او د پوځيانو ايستلو لپاره په ټولو لارو چارو غور کوي.
کانګريس ته د معلوماتو ورکولو پرمهال د امريکا دفاع وزير ‘مارک ايسپر’ او لوی درستيز جنرال مارک ميلي ويلي، د ټرمپ اداره غواړي چې دغه جګړه پای ته ورسوي.
دغه راز دغو لوړ رتبه امريکايي چارواکو دا هم ويلي، چې افغانستان وضعيت ته په کتو دوی له افغانستانه د خپلو عسکرو د ايستلو چمتوالی نیسي، هغوی دا احتمال هم رد نه کړ، چې د ترهګرۍ ضد جګړې لپاره يو شمېر عسکر په افغانستان کې پرېښودل شي.
امريکايي چارواکي داسې مهال د ځينو امريکايی عسکرو د احتمالي پاتې کېدو خبره کوي، چې قطر کې د امريکا او طالبانو ترمنځ د افغان جګړې د سوليیز حل په موخه تل خبرو کې له افغانستان څخه د ټولو بهرنيو ځواکونو وتل د اساسي شرط په توګه ياد کړي دي.
