(کابل ټکی کام، ۱۳۹۸ ليندۍ ۲۳، شنبه)
د راپورونو له مخې، طالبانو تيره شپه د غزني ولايت په قره باغ ولسوالۍ کې د محلي پوليسو یوه پوځي قرارګاه نيولې او لسګونه عسکر پکې وژل شوي دي.
ځايي امنیتي سرچينې وايي، طالبانو سره په دغه بريد کې په قرارګاه کې ميشت ځينو عسکرو مرسته کړې ده.
پژواک اژانس او ځينو خبري سرچينو په بريد کې د ۲۳ عسکرو د وژل کيدو راپور ورکړی خو طالب ویاند ذبیح الله مجاهد په خپله رسمي ټويټرپاڼه لیکلي، په برید ۳۲ عسکر وژل شوي، یو موټر او په زياته اندازه وسلې د طالبانو لاسته ورغلي دي.
مجاهد زياتوي:” تیره شپه د غزني ولایت قره باغ ولسوالۍ اړوند ولیګي سیمه کې مجاهدینو د مزدور دښمن په قرارګاه چاپه ووهله. د عملیاتو په نتیجه کې قرارګاه په بشپړه توګه فتحه شوه، ۳۲ تنه عسکر ووژل شول، یو ټانګ، یو موټر او ډيره وسله او مهمات دمجاهدینو لاس ته ورغلي “.
تر اوسه په دې اړه چارواکو او طالبانو ډير جزيات نه دي ورکړي.
طالبانو تر دې مخکې د دولتي ځواکونو په ليکو د نفوذي کسانو په مرسته ګڼې پوستې او پوځي مرکزونه نيولي او په مهمو چارواکو يې بريدونه کړي دي.
دغه راز وخت ناوخت طالبان په خپلو اعلاميو کې وايي، چې د پوځ په ليکو کې يې لسګونه نفوذي کسان ځای پرځای کړي او له موقع څخه په استفادې به پر عسکرو، چارواکو او بهرنيو ځواکونو خپلو بريدونو ته دوام ورکوي.
