(کابل ټکی کام، ۱۳۹۸ ليندۍ ۲۳، شنبه)
د هرات ولايت سيمه ييز چارواکي وايي، چې د دغه ولايت لپاره د ټاکنيزو شکايتونو د کمېسيون مالي مسؤول وژل شوی دی.
د هرات د والي ویاند جيلاني فرهاد وايي، نوموړی نن سهار د خپل کار په دفتر کې په ډزو وژل شوی دی.
د جيلاني په خبره، تر اوسه د دغه وژنې لامل نه دی په ډاګه شوی او دا هم نه ده روښانه چې د چا له خوا وژل شوی دی.
چارواکي وايي، استخباراتي او امنیتي مسؤولين د پيښې ځای ته رسيدلي او په دې اړه يې څيړنې پيل کړي دي.
که څه هم شاوخوا دوه مياشتې کېږي چې افغانستان کې د ولسمشرۍ انتخابات شوي خو په انتخاباتي کمېسيونونو کې د اختلافاتو او درغليو له کبله لا هم لومړنۍ پايلې نه دي اعلان شوي.
