ډاکټر یوسف اکبري
ښاغلی غبرګ عبدالله صاحب! يوڅو پوښتنې لرم چې دا په اصل کې د ټولو افغانانو پوښتنې دي؛ هيله لرم چې په سړه سينه يې ولولې او ژور فکر پکې وکړې. ښاغليه! له تاسو او ګردې نړۍ نه پټه نه ده، چې افغانانو ډېرې قربانۍ ورکړې، ډېر وځورېدل، وکړېدل……له قربانيو يې امريکا، انګلستان، ګاونډيانو او ټولې نړۍ ګټې پورته کړې، ډېر بې درېغه استعمال شول او دا سلسله لا روانه ده، نو:
ـــ آيا دا هغه قربانۍ نه دي چې قېمت يې دې ځورېدلي ولس ادا کړ او ګټې يې تاسو غوندې جنابان تر اوسه پورته کوي؟.
ـــ امريکايان چې ستاسو غوندې د جنابانو په اوږو سپاره کابل ته راننوتل؛ آيا تاسو دا زرين فرصت (؟) د يو ځانګړي قوم نه بلکې د يوې ډلګۍ او يا ټلوالې د څو محدودو نازولو په ګټه استعمال نه کړ؟.
ـــ ددې نوي لاسپوڅي حکومت په هرې نظامي او ملکي ادارې، هر بنسټ، وزارت، رياست…..کې ستاسو د همدې محدودو نازولو خپلوان او پلويان تاسو ونه ګمارل، چې نه کومه وړتيا لري او نه استعداد؟.
ـــ آيا هغه اداري فساد چې په تاريخ کې ساری نه لري او افغانستان يې په نړۍ کې د بدنامۍ څوکې ته و رساوه؛ ستاسو همدا پلويان او نازولي پکې ککړ نه دي؟.
ـــ آيا تاسو د افغان ولس د ګټو په ځای د همدې محدودو نازولو ګټو ته ترجېح نه ورکوئ؟.
ـــ آيا ستاسو انحصارطلبي او شخصيت پرستي ددې لامل نه دی چې د تاريخ درانه او پتمن افغانان په ګردې نړۍ او په ځانګړې توګه له کينه کښو ګوانډيانو سره سپک او خوار ګڼل کېږي؟.
ـــ آيا ستاسو انحصار طلبي او تنګ نظري ددې باعث نه شو چې د افغانستان دښمنان په يو موټي افغانانو کې ناوړه قومي تعصب او نژاد پرستۍ ته لمن ووهي؟.
ـــ آيا ستاسو له سيوري لاندې جنابانو په افغانستان کې د افغانستان په خلاف نعرې ونه وهلې؟.
ـــ آيا ستاسو د انحصار طلبۍ په نتيجه کې داسې دوه سری حکومت منځ ته رانه غی چې ولسمشر يې ستاسو له اجازې پرته يو مامور هم نه شي بدلولی؟.
ـــ آيا ستاسو د انحصار طلبۍ له کبله د يو نيم ميليون رايو ورکوونکيو د ټاکنو نتيجې په مياشتو ونه ځنډېدې؟.
ـــ آيا دا شرم نه دی چې په نړۍ کې د نورو هېوادونو د سوونو ميليونونو د ټاکنو نتيجې په څو ساعتونو کې اعلانېږي او ستاسو د حکومت د ټاکنو نتيجې ستا د انحصار طلبۍ له کبله په مياشتو ځنډېږي؟.
ـــ آيا تاسو ګمان کوئ چې ستاسو په دې ټولو ناخوالو افغانان نه پوهېږي؟.
ـــ آيا هغه افغانان چې د تورو لاندې يې ستاسو په نظام کې ستاسو په ټاکنو کې برخه واخيسته، ټګي يې نه ده کړې، دروغ يې نه دي ويلي…..يواځې په دې بهانه له خپلې رايې نه محرومېدای شي چې د کومې ستونزې له کبله يې له وخت نه مخکې يا وروسته رايه ورکړې ده، يا بايو ميټريک نه ده؟.
ـــ آيا تاسو او ستاسو نازولو لپاره هغه مالونه، مجلل کورونه، ډالرې، يورو، پونډونه، د عيش او ترف ژوند…. بس نه دي چې په دې څو لسيزو کې مو دافغانانو د قربانيو په قېمت لوټلي او خورد برد کړي مو دي؟.
ښاغليه! کرزی او اشرف غني خو هغه بې واکه نومونه دي چې تاسو پرې خپل فسادونه پټوئ او له فساده ککړ لاسونه پرې پاکوئ، دا دوه لسيزې خو په حقيقت کې حکومت ستاسو په لاس کې دی.
دا ګمان ونه کړې چې ګنې زه به دا خبرې د چا په پلوۍ کوم؛ بلکې دا هغه پوښتنې او خبرې دي چې ټول افغانان يې کوي. او دا هغه ترخه حقيقتونه دي چې د لمر غوندې څرګند دي؛ خو تاسو پرې سترګې پټې کړې دي.
