کابل ټکى کام (جمعه، ۲۹ لیندۍ ، ١٣٩٨ل)
د افغانستان او پاکستان لپاره د امریکا د بهرنیو چارو وزارت یوې پخوانۍ استازې لورل مېلر ویلي طالبان په افغانستان کې د داعشي ملېشو پر وړاندې د جګړې وړتیا لرلی شي.
د نوموړې په وینا، امریکا دا اندېښنه لري چې طالبان به له وسلوالو ډلو او پاکستان سره خپلې اړیکې وشلوي کنه خو پر دې ټینګار کوي چې طالبان دې له نړیوالو ترهګرو ډلو فاصله واخلي.
مېلر وايي، د افغانستان د سولې خبرې ژر تر ژره پایلې ته رسېدونکي دي خو په دې برخه کې ګڼې اندېښنې هم شته دي چې باید امریکا ځان ترې ډاډه کړي.
نوموړې ویلي د سولې هوکړه یې نه ده لیدلې خو ددې هیله لري چې په هغه کې پر طالبانو له نورو وسله والو سره د اړیکو پرېکولو شرط منل شوی وي.
د طالبانو او امریکایي مرکچیانو ترمنځ له نږدې یو کال راهیسې مذاکرات روان دي، دامریکاځانګړي استازي تیره ورځ په خپل ټویټر لیکلي وو چې دامهال دوی یو مهم راونډ ته داخلیږي، فکر کیږي چې دا به د لاسلیک احتمالي زیری وي.
