کابل ټکی کام (دوشنبه، ۲ مرغومی، ۱۳۹۸ل)
“رویټرز خبري آژانس” ادعا کړې چې د ايران دتيرې مياشتې دحکومت ضد لاريونونو په مهال ۱۵۰۰ لاريون کونکي وژل شوي دي.
د یاد اژانس د ادعا له مخې د ایران د مذهبي ريژيم ستر مشر “ايات الله علی خامنه ای” د ایران امنيتي چارواکو ته امر کړی و چې د مظاهرو د کنترولولو په موخه چې هره لاره ویني باید ترې مخ وا نه ړوي.
د رويټرز آزانس په ادعا کې ويل شوي وروسته تر هغه چې په ایران کې د بیو د لوړيدو په ضد لاريونونه له کنټروله ووتل نو مذهبي مشر ټول امنیتي چارواکي راټول کړل او هغوی ته یې وویل، د لاريونونو دخاموش کولو لپاره هره لازمه پرېکړه کولی شي.
د ياد راپور له مخې د مذهبي مشر “علی خامنه ای” د امر په بنسټ د ایران دسپاه پاسداران ځواکونو په دغه هېواد کې تر ۱۵۰۰ ډېر لاريون کوونکي ووژل او په زرګونو نور يې ټپیان او زنداني کړل.
د يادونې وړ ده چې ایراني چارواکو تر اوسه د ” رويټرز آژانس ” د ادعا په اړه غبرګون نه دی ښودلی خو مخکې تر دې يې دلاريون کونکو دځپلو په اړه هر ډول ادعاوي رد کړي.