کابل ټکی کام (جمعه، ۶ مرغومی، ۱۳۹۸ل)
د افغانستان جنوب کندهار ولایت کې د هيواد په کچه د درمل جوړونې تر ټولو سترې فابریکې جوړېدو ۷۰ سلنه چارې بشپړې شوې دي.
د ‘سنو فارما’ فابریکې مسوول محمد سعید صدیقي په خبره: ” د فابریکې چارې يې ۷۰ سلنه بشپړې شوې دي او د ۲۰۲۰ کال تر نیمايي پورې به تکميل شي.”
ټاکل شوې ده چې دغه فابریکه به په هرو ۷ ساعتونو کې د دوه میلیونه ګوليو، یو میلیون کېپسول او سل زره سېرومونو د تولید ظرفيت ولري.
د ‘سنو فارما’ فابريکې مسوولین ټينګار کوي چې هڅه کوي تر څو دا فابریکه د سیمې په کچه ښه معيار ولري. د هغوی په وينا، د فابریکې ټول فعاليتونه به د روغتیا د نړیوال سازمان له لوري څارل کېږي.
د یادونې وړ ده چې دغه فابریکه د ۷۱ افغان سوداګرو له لوري په ۲۷ جریبه ځمکه کې د ۵۰ میلیونه ډالرو په لګښت جوړېږي.
