کابل ټکی کام (جمعه، ۶ مرغومی، ۱۳۹۸ل)
طالبانو خبر ورکړی، چې کندوز ولايت کې يې د بهرنيو او کورنيو عسکرو په قطار چاودنه کې ګڼ شمېر بهرنيو او کورنيو ته مرګ ژوبله اړولې ده.
طالب ویاند ذبیح الله مجاهد په يوه خبرپاڼه کې ويلي چې تېره شپه یې جنګياليو دکندز ولایت مرکز ته څيرمه “بزکندهاري” سیمه کې د امریکایي او دولتي ځواکونو په قطار چاودنې ترسره کړې چې د لومړنيو معلوماتو له مخې ۲ امریکایي عسکر وژل شوي او ګڼ بهرني او داخلي عسکر ټپیان شوي هم دي.
مجاهد په چاودنو کې د ۲ پوځي ټانګونو د بشپړ ویجاړیدو ادعا هم کړې ده.
که څه هم ددې تازه پيښې په اړه بهرنيو عسکرو تراوسه غبرګون نه دی څرګند کړی؛ خو څو ورځې وړاندې د کندز په چهاردرې ولسوالۍ کې د طالبانو بريد کې يو امريکايي استخباراتي افسر وژل کېدل يې تائيد کړي و.
