سرمقاله
زياتره هغه رسنۍ چې ځانونه د ډيموکراټيکو او جمهوري نظامونو د بيان د ازادۍ تر شعار لاندې خپلواک او ازاد بولي، خپلو فعاليتونو او رسنيزو چارو ته د ولسونو د خدمت نوم ورکوي، او فعاليتونه کوي، دغه رسنۍ شعار ورکوي چې ګواکې د ټولنو غږ منعکسوي.
د دغو رسنيو لۀ جملې څخه بي بي سي، ازادۍ، امريکا غږ، وي او اې ډيوه او نورې د يادولو وړ دي.
د دې تر څنګ چې يادې رسنۍ د خپلو ټولنو په خلاف پروپاګند او راپورونه نشروي؛ ځينې افواهات او بې بنياده راپورونه هم نشروي او بيا يې تر څنګ دا ليکي چې دوی ته د … ډلې ته منسوبې سرچينې د نوم نه ښودلو پۀ شرط ويلي چې … .
خو دا چې د يادو رسنيو د نوم نه ښودلو سرچينې کومې دي؛ يادونه کوو!
د دغو رسنيو د نوم نه ښودلو سرچينې دوه قسمه دي
۱— پۀ دې خو اوس ټوله نړۍ اګاه ده چې امريکا او نور غرب د مسلمانانو پۀ خلاف پۀ هره جګړه کې پر تبليغاتي اړخ زيات زور اچوي او د خپلې بوديجې زياته برخه همدې برخې ته وقف کوي تر څو د مسلمانانو اذهان مغشوش کړي. چې صليب ته دغه خدمت پۀ اسلامي نړۍ کې همدغو د بيان د ازادۍ ورکوونکو رسنۍ کوي. نو دا چې پۀ حقيقت کې د پورته يادو شويو رسنيو هر راپور چې ( فلانۍ رسنۍ ته يوې سرچينې د نوم نه ښودلو پۀ شرط ويلي) جمله ولري؛ دا ډول راپورونه افواه او درواغ دي او تبليغاتي جنبه لري.
۲— د پورتنيو رسنيو دغه ډول ادعاوې بله جنبه هم لري او هغه دا چې د دوی نوم نه ښودونکې سرچينې اصلا د هغو امريکايي پلوه خلکو افواهات او چورلټ درواغ دي چې پۀ هر وخت کې يې د امريکايي يرغل حمايت کړی او همېشه یې د امريکايي يرغل دوام ته کار کړی او دغه خلک غوڅ اکثريت د کابل د ادارې غړی دي، چې همدا ډول خلک د رسنيو د نوم نه ښودنې سرچينې دي.
۳— ځينې هغه ټولنيزې رسنۍ چې ځانونه طالبانو ته منسوبوي او د هرې پېښې پۀ وړاندې خپل نظرونه څرګندوي، خو پۀ حقيقت کې دوی يوازې خپل نظر څرګندوي. مګر غرب پلوه رسنۍ اکثره وخت د همدې خلکو لۀ خولې راپورونه خپروي او بيا يې طالبانو ته نږدې سرچينې بولي.
