کابل ټکی کام (سه شنبه، ۱۴ چنګاښ، ۱۴۰۱ل)
یونیسف یا د ملګرو ملتونو د ماشومانو وجهي صندوق ويلي چې پکتیکا کې د وروستۍ زلزلې له کبله ۳۶۲ زره کسان اغېزمن شوي چې ۶۰ سلنه یې ماشومان دي.
یونیسف زیاته کړې چې ياد شمېر کسان بېړنيو مرستو ته اړتيا لري. افغانستان کې د يونيسف استازي “محمد ايويا” ويلي، چې زلزله ځپلو ته يې په راتلونکو دريو مياشتو کې د مرستو رسولو هر اړخيز پلان جوړ کړی دی.
ملګرو ملتونو ويلي چې په لومړي ګام کې د خلکو د لومړنيو اړتياوو د پوره کولو هڅه کېږي او وروسته به يې د کورنو د جوړولو او اوږدمهالو اړتياوو د پوره کولو لپاره اقدامات ترسره وشي.
باید وویل شي چې په دوه اوونۍ وړاندې د هیواد ختیځ ولایتونه خوست او پکتیکا یوې زورورې زلزلې وځپل چې په پایله کې یې زرګونو کسانو ته مرګ ژوبله واړوله او زرګونه کورونه یې ونړول.
