کابل ټکی کام (شنبه، ۱ زمری، ۱۴۰۱ل)
د افغانستان د ماليې وزارت وايي، چې د افغانستان دنفت او ګاز دولتي شرکت، دماليې، خارجه، تجارت وزارتونو، د افغانستان بانک او نورم او سټندرد ادارې د ګډ هیئت په ملتیا د ایران جمهوري اسلامي هیواد ته د نفتي موادو د پیرلو لپاره رسمي سفر ترسره کړ.
د ماليې وزارت په خبرپاڼه کې راغلي، چې ددې سفر په ترڅ کې د کیفیت، نرخونو،ترانزیټ او تجارانو ته د لازمو سهولتونو برابرولو اړوند مجالس ترسره او د G2G یا دولت په دولت قرارداد، د نفتي موادو د پایپ لاین غزولو او ګډو تصفیه خانو جوړولو لپاره د دواړو طرفونو لخوا د یوې ګډې کمیټې په رامنځته کېدو هوکړه وشوه.
راپور زياتوي، د اوس لپاره د ایران هیواد د یوه شرکت سره د شاوخوا۳۵۰ زره ټنه په اندازه د نفتي موادو قرارداد وشو، چې په لنډو ورځو کي به ئې افغانستان ته واردول پیل شي، او ورسره به د هيواد په بازارونو کي د نفتي توکو نرخونه د پام وړ را کښته شي.
د ماليې وزارت ليکي، چې د دواړه لوریو په توافق هغه افغان خصوصي شرکتونه چې په ایران هیواد کې د نفتي توکو اړوند معاملات ترسره کوي، هغوی به د افغانستان اسلا-می اما-ر-ت لخوا په رسمي توګه معرفي کیږي٠
