کابل ټکی کام (یکشنبه، ۱۶ زمری، ۱۴۰۱ل)
په داسې حال کې چې اسرائیلي نیواکګرو په دریمه ورځ هم پر غزې تړانګې خپلو بریدونو ته دوام ورکړی، د حماس اسلامي غورځنګ پوځي څانګې “القسام” یې هم په غبرګون کې د یهودي پلازمینې تل أبیب په ګډون په ګڼو اسرائیلي ښارونو سلګونه توغندي ویشتلي، چې د اسرائیلي رسنیو د خبر له مخې یو شمېر کسانو ته پکې مرګ ژوبله اوښتې ده.
د اسرائیلي پوځ ویاند رسنیو ته ویلي، چې د حماس ډیری توغندي د دوی د دفاعي سیستم لخوا له منځه وړل شوي؛ خو یو شمېر یې د دوی سیمو کې لګیدلي، چې د ښځو او ماشومانو په ګډون پکې ګڼ شمېر ملکي وګړي وژل شوي دي.
که څه هم اسرائیلو خپل لوري ته د اوښتې مرګ ژوبلې کره شمېره نه ده ښودلی؛ خو یوې اسرائیلي رسنۍ ویلي، چې د حماس په بریدونو کې ۱۶ اسرائیلي وګړي وژل شوي او تر ۳۰ پورې نور ټپیان دي.
په ورته مهال فلسطیني سرچینې وایي، چې په غزې تړانګې د اسرائیلي اشغالګرو په هوایي او توغندویي بریدونو کې د شپږو ماشومانو په ګډون ۳۲ فلسطنیان شهیدان شوي او لسګونه نور ټپیان شوي دي.
