کابل ټکی کام (جمعه، ۱۱ وږی، ۱۴۰۱ل)
د امریکا د دفاع وزارت په یوه تازه خپاره کړي راپور کې ویلي چې ددې هیواد په پوځ کې د جنسي ځورونې پیښې ۱۳ سلنه ډیرې شوي دي.
په راپور کې راغلي چې د جنسي تاوتریخوالي پېښې د ریکارډ په کچه ډیرې شوي دي.
د پنټاګون د جنسي تاوتریخوالي د مخنیوي او ځواب ویلو ادارې په راپور کې ویل شوي چې تېر کال په پوځ کې د جنسي تاوتریخوالي ۸۸۶۶ پېښې راپور شوې وې او داسې پېښې وې چې یا کوم سرتیري جنسي تاوتریخوالی کړی و او یا پرې شوی و.
سره له دې چې په پوځ کې د جنسي تاوتریخوالي ډیرې لږې پېښې چارواکو ته راپور کیږي خو د پنټاګون د جنسي تاوتریخوالي د مخنیوي او ځواب ویلو ادارې د سرتېرو د سروې ګانو له مخې اټکل کړی چې تېر کال په ټول پوځ کې نږدې ۳۶ زرو سرتېرو چې نارینه او ښځینه دواړه پکې دي، جنسي تاوتریخوالی تجربه کړی دی.
