کابل ټکی کام (چهارشنبه، ۳۰ وږی، ۱۴۰۱ل)
د افغانستان لپاره د امریکا ځانګړي استازي “توماس ویسټ” په خپلو تازه څرګندونو کې ویلي، چې هېواد به یې د افغانستان بانک د ظرفیت په لوړولو کې خپلو هڅو او همکاریو ته دوام ورکوي.
نوموړي د خپلو خبرو پر دوام ویلي دا ذهنيت سم نه دی چې د افغانستان بانک ازادې شوې شتمنۍ به د بشري مرستو د رسولو په لاره کې ولګول شي.
ویسټ زیاته کړې ده، چې د سويس يوه بانک ته د ازادو شويو شتمنيو د لېږد موخه دا ده چې افغانستان کې اقتصادي فعاليتونه پيل او اقتصادي ثبات ټينګ شي.
افغانستان لپاره د امريکا ځانګړي استازي دغه راز ټينګار کړی چې د افغانستان بانک د ظرفيت په لوړولو کې خپلو هڅو او همکاريو ته ادامه ورکوي او هيله لري چې دغه اداره يوه ورځ د دې جوګه شي چې ازادې شوې شتمنۍ په ډاډ سره ور وسپارل شي.
ده ټينګار کړی چې د افغانستان فنډ په نوم صندوق ته د افغانستان د ارزي شتمنيو لېږد یې دويم غوراوی دی او که چيرې افغانستان بانک ټاکلي شرایط پوره نه کړای شي نو دوی به له دې لارې له افغانانو سره خپلو مرستو ته ادامه ورکړي.
