حسان مجاهد
_ابو اسحاق رح وايي: ای ځوانانو! ځواني غنیمت وګڼئ؛ په ما داسې ډيرې شپې تيريږي چې زه په کې زر آيتونه تلاوت کوم، سورة بقره په يوه رکعت کې لولم، د حرم دمياشتو، ددوشنبې او پنجشنبې په ورځ او له هرې مياشتې څخه درې روژې نیسم. ځوان بايد دځواني مرحله دعبادت لپاره ښه فرصت وګڼي!
_مالک بن دينار رح وايي: بې شکه خير ټول په ځواني کې ده. دی «رح» دې اشاره کوي چې ځواني د ستر برکت او خير مرحله ده، کوم ځوان چې دغه مرحله په عبادت او د امت په خير خواهي کې صرف کړي؛ ده دځواني قيمت درک کړ او کوم ځوان ته چې دځوانۍ قوت، دوخت فراغت، ډير مال او د وخت فتنې برابري شي؛ بیا نو دغه شيان دځوان لپاره ستر مهلکات دي.
_زید بن ابي الزرقاء رح وايي: موږ دسفيان ثوري رح په دروازه و چې دی راووت او موږ ته يې وويل« ای ځوانانو! دعلم د ترلاسه کولو لپاره ځواني غنیمت وبولئ!» ځکه په ځواني کې چې دعلم کومه لاسته راوړنه ممکنه ده؛ په بوډا توب کې هغسې نه ده ممکنه، ځواني ډيره په تيزۍ سره تيريږي؛ امام احمد بن حنبل رح وايي: زه ځواني هغه شي ته ورته ګڼم چې زما په لستوڼي کې وي او بيا يو دم رانه ورک شي.
_حسن بصري رح به ډير ویل: ای ځوانانو! آخرت وغواړئ (ځانونه ورته تيار کړئ!) ډير دآخرت طلب ګار مو داسې ليدلي دي چې، الله تعالی دنيا هم ورکړه، خو هيڅ ددنیا طلب ګار مو نه دی ليدلی چې آخرت يې هم په برخه شوی وي.
_ عقبه بن ابي حکيم رح وايي: موږ ته عون بن عبد الله رح وویل « ای ځوانانو! موږ ډير ځوانان وينو چې مړه کيږي، کښت چې سر ته ورسیږي؛ نو دريبلو وخت يې رانږدې شي او دځوان چې عمر تير شي مرګ يې رانږدې شي. يو شاعر وايي: «يعمر واحد فيغر قوما ** وینسی من يموت من الشباب» ژباړه: يو عمر خوړلی بسته قوم دوکه کړي(ډير ځوانان دبوډا په ليدلو سره خپلې چارې ځنډوي او وايي؛ زه چې ددې بوډا عمر ته رسېږم، ډير وخت لا پاتې ده) حال داچې ددوی مړه شوي ځوانان هير دي. ابن جوزي رح وايي: ځوان دي په خپله ځواني او قوت نه شې دوکه؛ ځکه بوډاګان کم مړه کيږي، ځوانان او ماشومان زيات مړه کیږي. موږ وینو چې هدیرې له ځوانانو ډکې دي.
_عبد الوهاب الثقفي رح وايي: موږ ته ايوب السختياني رح وويل « ای ځوانانو! کسب کوئ؛ ددې لپاره چې ددغو( مالدارو) دروازو ته اړ نشئ!» يعني ځوانان باید له تعليم سره ددنيا کسب هم زدکړي او په خپلو مټو زور واچوي، تر څو بیا نورو ته اړ نه شي.
_جعفر رح وايي: موږ دقبلې په خوا کې ناست و، چې ثابت بناني رح راووت او موږ ته يې وويل « ای ځوانانو! تاسې زما او زما درب ترمنځ مانع ياست چې زه خپل رب ته يوه سجده وکړم!» نن ورځ بعضي ځوانان په مسجد کې سره ټول شي، بې ګټي دنیوي خبري کوي، په خپله هم عبادت نه کوي او دنورو دعبادت خوند او خوشوع هم له منځه يوسي، اکثره ځوانان په مسجد کې د ټليفون له لارې خلګو ته اذيت رسوي. نو ځوانان بايد خپله هم عبادت وکړي او نور هم له عبادته ونه باسي.
_حسن بصري رح وايي: ای ځوانانو! له تسویف(دکار له ځنډولو څخه) ځانونه وژغورئ؛ یعني ژرده دا کار به کړم او ژرده دا به کړم. ځوانان دي په توبه او نورو نيکو کارونو کې ځنډ نه کوي؛ ځکه ډير کله په دې تمه ځواني ټوله تيره شي، بعضي خلګ دتوبې په ايستلو کې زړه نازړه شي آخر تر دې چې مرګ يې ميلمه شي.
_محمد بن يوسف وايي: په موږ ځوانانو به شپې مهال سفيان ثوري رح غږ وکړ « ځوانانو! پورته شئ لمانځه ته، هميشه خو به ځوانان نه یاست!»
مأخذ: (وصايا السلف للشباب)
