بل ټکی کام (شنبه، ۵ لیندۍ، ۱۴۰۱ل)
د افغانستان اسلامي امارت د فرهنګي کمیسیون د مخکني مشر استاد یاسر زوی عمار ياسر ويلي، چې د ده معلوماتو له مخې چې پلار يې ژوندی دی او په دې اړه حکومتي مسؤلينو سره معلومات شريک کړي.
عمار ياسر چې په قطر کې له امريکا سره د مذاکراتي ټيم غړی هم پاتې شوی په خپل رسمي ټويټر اکاونټ ليکلي، چې په پاکستان کې د محترم استاد ياسر له زنداني کیدو درې کاله وروسته د نوموړي د شهادت اوازه خپره شوه، چې په وينا يې تر نن پورې په اثبات ونه رسیده.
عمار ياسر زياتوي، څو ورځې وړاندې یو ورور ډاکتر کریم تڼیوال دا خبر نشر کړه چې ما په خپل شخصی تعلق د دوبۍ استخباراتو څخه دا معلومات ترلاسه کړل چی استاد ژوندی دی.
او د پاکستان په زندان کی دی.
عمار ليکلي، چې دوی د ډاکټر تڼيوال سره شخصی اړيکې نيولي او نوموړي ډاکټر ورته د استاد ياسر د ژوندون پوره ډاډ او اطمینان ورکړی.
عمار ياسر وايي، د نوموړي ډاکټر څخه ترلاسه کړي معلومات يې د خپل حکومت مسؤلینو سره شریک کړي: ترڅو د پاکستان حکومت سره مطرح شي.
تردې مخکې هم د استاد ياسر د شهادت په اړه اوازې خپرې شوي او طالبانو په مخکنيو اعلاميو کې له پاکستاني چارواکو غوښتنې کړي چې د استاد یاسر د مړینې په اړه معلومات ورکړي خو پاکستان حکومت تر اوسه په دې اړه هيڅ سپيناوی نه دی کړی او نه يې د استاد کورنۍ ته د هغه په اړه معلومات ورکړي.
د افغانستان د اسلامي امارت د فرهنګي کمیسیون پخوانی مشر، مشهورعلمي او جهادي شخصیت ويناوال استاد محمد یاسر د ۲۰۰۹ کال په جنورۍ میاشت کې په پېښور کې د پاکستاني امنیتي ځواکونو له خوا نیول شوی و.
