کابل ټکی کام (چهارشنبه، ۹لیندۍ، ۱۴۰۱ل)
د راپورونو له مخې، د پاکستان بلوچستان ايالت په کويټه ښار کې پر پوليسو د موټربم له امله ګڼ شمېر پوليسو ته مرګ ژوبله اوښتې ده.
د کويټې د پوليسو مشر غلام اظهر مهسر رسنيو ته وويل، چاودنه په «بلبلي» سيمه کې د پوليسو څخه پر يوه ډک لوي موټر هغه مهال وشوه، چې پکې پوليس منسوبين د پوليو ټيمونو ساتنې لپاره روان و.
د پوليس مشر په وينا، په دې موټربم چاودنه کې يو پوليس او يو عام کس وژل شوي، شل تنه نور پوليس او څلور ملکيان ټپيان دي، چې په ټپيانو کې د ۲ تنو پوليسو روغتيايي وضعيت ښه نه دی.
په سوشل ميډيا خپرو شويو ويډيو انځورونو کې پوليس په زخمي حالت کې ليدل کېږي او پر موټرو يې اور بل دی.
ځينې ناتائيد شوي راپورونه وايي، چې په ياده چاودنه کې د ۱۰ تر ۱۵ پوليس وژل شوي او ۲۲ تنه ټپيان دي.
د پاکستان تحريک طالبان تېره ورځ ويلي و، چې حکومت سره يې اوربند پای ته رسېدلی دی.
