کابل ټکی کام (پنجشنبه، ۱۰ لیندۍ، ۱۴۰۱ل)
د اسلامي امارت په مشرۍ افغان سرپرست حکومت په هیواد کې د امریکا غږ او ازادۍ رادیو پر خپرونو ځکه بندیز لګولی چې په خبره یې یادو رادیوګانو یو اړخیز نشرات کول.
د افغان حکومت د اطلاعاتو او کلتور وزارت له خوا په خپره شوې لارښوونه کې امر شوی چې پر ایف ایم او منځنۍ څپو د دغو ادارو خپرونې د دسمبر له لومړۍ نېټې بندېږي.
امریکا غږ او ازادۍ رادیو د ایف ایم د ۱۵ څپو او دوو منځنیو څپو له لارې په افغانستان کې د ورځې ۲۴ ساعته خپرونې کولې چې دوولس یې پښتو او دوولس ساعته یې دري وې.
د اطلاعاتو او کلتور وزارت کې پر رسنیو د څار د ریاست مشر “ملا عبدالحق حماد” پر خپله ټویټر پاڼه لیکلي: د افغانستان په ۱۳ لويو ښارونو کې پر ايف ايم د ازادۍ راډيو نشرات بند شول.
دا راډيو چې د امريکايي اشغال له پيل سره يې نشرات پيل کړي وو، د ژورناليستيکي اصولو د نه مراعت کولو او يو طرفه خپرونو له امله وتړل شوه.
د ویلو ده چې امریکا غږ، آزادۍ رادیو او ځینو نورو رسنیو د افغان حکومت اقدام خواشینونکی بللی دی؛ خو په ورته مهال ډیرو افغانانو یې ستاینه کړې ده.
د افغانستان په ۱۳ لويو ښارونو کې پر ايف ايم د ازادۍ راډيو نشرات بند شول.
دا راډيو چې د امريکايي اشغال له پيل سره يې نشرات پيل کړي وو، د ژورناليستيکي اصولو د نه مراعت کولو او يو طرفه خپرونو له امله وتړل شوه.— Abdul Haq Hammad عبدالحق حماد (@AbdulHaqHammad2) December 1, 2022
