کابل ټکی کام (پنجشنبه، ۲۲ مرغومي، ۱۴۰۱ل)
د افغانستان د ریل پټلۍ اداره وايي، چې افغان هوايي ځواکونو هغه څلور تنه ايراني انجينران او د هغوی پنځه تنه ساتونکي مجاهدين چه په واورو کې بند و ژغورلي دي.
د ريل پټلۍ اداره وايي، د ايراني انجينرانو ياد ټيم د خواف – هرات رېل پټلۍ د تخنيکي ارزونې په موخه یاد ولایت ته داخل شوی وو، چې تیره ورځ د هرات ولايت په «دشت شمتیغ» کې د بېرته راتګ پر مهال په لاره کې د سختو واورو وریدو له امله بند پاتې شو.
د ريل پټلۍ اداره وايي، چې د انجينرۍ ټيم د بندیدلو موضوع يې د ملي دفاع وزارت مقام سره شريکه کړې وه، چې د ياد وزارت په آمر له يوه ساعت په کمه موده کې د انجينرۍ ټيم ته نجات ورکړل شو.
د ملي دفاع وزارت هم ياده موضوع د يوې خبرپاڼې په خپرولو سره رسنيو سره شريکه کړې او ويلي دي، چې په پوره ژمنتیا او اخلاص سره د ښه خدمت لپاره له هیڅ ډول همکارۍ او هلو ځلو څخه ډډه نه کوي.
