کابل ټکی کام (پنجشنبه، ۲۲ مرغومي، ۱۴۰۱ل)
افغانستان سره د استراليا له خوا د کرکټ د لوبو لغوه کولو په اړه د افغانستان کرکټ بورډ او مشهور افغان لوبغاړي راشدخان توند غبرګون ښودلی دی.
څو ساعتونه مخکې د اسټرالیا کرکټ بورډ د یوې اعلامیې په خپرولو سره وويل: (له افغانستان سره یې د راتلونکي نړیوال جام سیالیو د سوپر لیګ درې لوبې لغوه کړې) چې افغانستان کرکټ بورډ دغه پرېکړه غیرعادلانه، له وخته وړاندې او اندېښمنونکې بللې او ويلي يې دي چې په دې اړه به له یاد بورډ او د کرکټ له نړیوالې شورا سره ډېر ژر خپل دریځ شریک کړي.
افغانستان کرکټ بورډ ويلي، چې له دې وړاندې له اسټرالیا سره د دوه اړخیزه ناستو په پایله کې د راتلونکې لوبلړۍ د ترسره کولو په موخه بشپړې پرېکړې ته رسېدلی و چې د یاد بورډ له لوري ورته پوره ډاډ هم ورکړل شوی و، چې پر بنسټ یې افغان کرکټ بورډ په خپل کوربه توب له هېواده بهر د لوبو د ترسره کولو ځای، غوره مدیریت، د امنیت ټینګښت او نورو اړوند مواردو ته بشپړ چمتووالی درلود:(دا چې یاد بورډ ورته پرېکړه کړې نو افغانستان کرکټ بورډ یې سیاسي، غیرمنطقي، له وخت وړاندې او د افغانستان له یوه ستر او کرکټ سره مینه درلودونکي ملت سره ستره جفا بولي.)
افغان کرکټ بورډ ويلي، چې دغه بورډ به پر ټولو هغو اړیکو او روابطو چې له دې وړاندې یې له اسټرالیا کرکټ سره درلودې او همدارنګه د اسټرالیا په بېګ باش لیګ کې د ټولو افغان لوبغاړو پر ګډون له سره غور وکړي.
افغان کرکټ بورډ ويلي، چې په دې اړه به هر څه د کرکټ له نړیوالې شورا سره شریک کړي، ترڅو اسټرالیا کرکټ یو ځل بیا پر خپلې پرېکړې له سره غور وکړي او د کرکټ له سیاسي کولو ډډه وکړي، ځکه کرکټ د مینې خپرولو او د سولې د پيغام رسولو پدیده ده او ورته پرېکړې حکومتونه نه اغېزمنوي، بلکې زیان یې ملتونو او له کرکټ سره د خلکو خوښیو او مینې ته رسیږي.
دغه راز د افغانستان د کرکټ مشهور لوبغاړي راشد خان په خپله رسمي فیسبوک پاڼه ليکلي، چې د استرالیا د کرکټ بورډ په دې پرېکړې ډېر خواشینی شوی زياتوي زه د خپل هېواد لپاره په ډېر ویاړ لوبېږم او موږ د کرکټ په نړۍ کې ډېر پرمختګ کړی دی او د استرالیا دا پرېکړه زموږ دا پرمختګ خرابوي او موږ بېرته شاته بیايي.
ښاغلي راشد خان ويلي، که له افغانستان سره لوبه کول د استرالیا لپاره دومره نا راحت کوونکي وي (زه هم نغواړم چې په بګ بش کې په خپل موجودیت او هلته لوبو کولو باندې خلک ناراحت کړم. زه به په دې اړه جدي فکر وکړم.) نوموړي د استرالیا د کرکټ بورډ څخه غوښتي چې خپله پرېکړه بدله کړي.
