م. احمد الهام
کله چې ۴۳ کاله مخکې د پخواني شوروي اتحاد ځواکونو د ځمکې او هوا له لارې پر افغانستان یرغل وکړ چې له امله یې میلیونه افغانان د هیواد پرېښودلو ته اړ شول او ګاونډیو هیوادونو پاکستان او ایران ته مهاجر شول خو پاکستان ته د ورغلو افغانانو شمېر میلیونونو ته رسیده ځکه پاکستاني ولس سره یې مذهبي او کلتورې اړېکې تر ایران ډیرې وې.
له مشرانو مو اوریدلې و، چې د پاکستان مسلمان ولس او حکومت یې د شوروي اتحاد ځواکونو او افغان کمونستانو له ظلمونو تښتیدلو افغانانو ته خپله غیږه خلاصه کړه ان پاکستاني ولس د خپلو کورونو سامانونه هم ورسره بیل کړل ترڅو د افغان مهاجرینو اړتیاوې پرې پوره شي.
پاکستاني حکومت چې هغه مهال یې مشري د پوځ سرلښکر “شهید جنرال ضیاءالحق” کوله په نړیوال سټیج د افغان مهاجرینو او مجاهدینو لپاره د مرستو د راغونډولو هڅې پیل کړې چې له امله یې د نړیوالو توجه افغانستان ته راجلب شوه چې ورسره مهاجرینو سره مالي کومکونه او مجاهدینو سره نظامي مرستې پیل شوې چې ورسره د مهاجرینو اقتصاد غښتلی او په نظامي ډګر کې هم افغان مجاهدین د شوروي یرغلګرو لښکرو او افغان کمونیستي ملیشو پر وړاندې برلاسي شول.
په پای کې روسانو په افغانستان کې ماته وخوړه، لاسپوڅي حکومت یې هم د مجاهدینو د تندریزو بریدونو تاب را نه وړ او نسکور شو؛ خو متأسفانه د مجاهدینو مشران د یو واحد اسلامي نظامي په راوستلو بریالي نه شول او په خپل مینځ کې یې د قدرت پر سر جګړې پیل کړې چې له امله یې د کابل په ګډون د افغانستان ډیر ښارونه ویجاړ شول او زرګونه افغانان ووژل شول.
افغان ولس د یو داسې چا راتګ ته سترګې پر لاره و چې له دې ناوړه برخلیک یې وژغوري چې الله تعالی ملا محمد عمر مجاهد رحمه الله ته الهام وکړ او د ولس له مینځه یې د شر او فساد د له منځه وړلو په موخه د یو حرکت بنسټ کیښود چې ډېر ژر په نړیوالو رسنیو کې د ” طالبانو د اسلامي تحریک” په نوم وپېژندل شو یو پر بل پسې یې د ښارونو په نیولو پیل وکړ ترڅو کابل ته را ورسیدل او د واک واګې یې تر ګوتو کړې او د مجاهدینو هغه ګوته په شمېر مشران چې نومونه یادول یې مناسب نه ګڼم او د دوی اړوندې خونخوارې ملیشې تر کولابه وځغلولې، افغانستان یې له تجزیې وژغوره او د یو واحد اسلامي نظام په جوړولو بریالي شول چې نوم یې “اسلامي امارت” شو.
بیا هم له ټولو وړاندې پاکستان و چې د طالبانو لومړی حکومت یې په رسمیت وپيژانده چې ورپسې ځینو نورو هیوادونو هم ورته اقدام وکړ.
خو کله چې د ۲۰۰۱م کال د سپټمبر په ۱۱ مه امریکا کې په یوه سوداګریز مرکز او ځینو نورو ودانیو القاعدې پورې تړلو مشکوکو وسله والو الوتکې وتښتولې او یاد مرکزونه یې په نښه کړل چې نیږدې ۳ زره امریکایان پکې ووژل شول نو امریکایې مخامخ پړه په القاعده واچوله او د امریکا د هغه مهال ولسمشر “بوش” د صلیبي جګړې په اعلانولو سره پر افغانستان برید وکړ دا نو داسې وخت و چې پاکستان کې جنرال مشرف واکمن و، چې امریکا ته یې د اډو په ورکولو سره د پاکستان حیثیت ته ستره ضربه ورسوله خو د پاکستان مسلمان ولس د تل په څېر بیا هم د افغانانو ترڅنګ ودریده، د لاریونونو په کولو سره یې د جنرال مشرف پرېکړه وننګوله او افغان طالبانو او ولس ته یې بیخې ډېرې چاندې راټولې کړې ان پاکستانیو میرمنو خپل زیورات چې طبعي خبره ده ښځو ته ډېر ګران وي افغان طالبانو ته په تحفه کې راولیږلې ترڅو خرڅې یې کړي، وسلې پرې واخلي او د امریکا په مقابل کې پرې وجنګیږي چې افغانان به کله هم د پاکستاني مسلمان ولس دا احسان هیر نه کړي انسان تر خپلې وسې پړ ده او دا به د دوی خوارانو وس و.
او تر هغه وروسته د یاد هیواد د پخواني لومړي وزیر عمران خان او ګڼو نورو سیاستوالو په خبره تاریخ به کله هم د مشرف دا خیانت هیر نه کړي او دوی به د بیا لپاره کله هم چاته اجازه ور نکړي چې د پاکستان خاوره د افغانستان پر ضد وکاروي.
تېر په هېر اوس به د اصلي مطلب په پیل سره مقاله راغونډه کړو.
کله چې د امریکا په مشرۍ صلیبي ائتلاف پر افغانستان یرغل وکړ او د طالبانو لومړۍ واکمني یې نسکوره کړه حامد کرزی او د طالبانو نور مخالف مشران واک ته ورسیدل ور پسې اشرف غني واک تر ګوتو کړ نو په دې ټوله شل کلنه دوره کې په حکومتي او غیر حکومتي کچه دوامدارې هڅې وشوې چې د افغان او پاکستان مسلمانو ملتونو ترمنځ نفرتونه ایجاد کړي د هغو ملتونو ترمنځ چې د خولې ګوله یې هم سره شریکه وه چې تر ډیره په خپلو دغو شومو هڅو کې بریالي هم شول.
اوس چې په افغانستان کې اشغال پای ته رسیدلی ده، نوی تحول راغلی او یوځل بیا اسلامي امارت واک ته رسیدلی ده پاکستان کې هم بدلون راغلی دی. باید هم د حکومتونو په کچه هڅې وشي چې ترمنځ مو راغلې فاصلې ختمې شي او بل دا چې اوس د شوشل مډیا زمانه ده هر افغاني او پاکستاني شوشل ورکر باید اتحاد او اتفاق ته کار وکړي ان شاءالله مثبتې نتیجې به ولري.
د پاک- افغان دوستي د تلپاتې دوام په هیله….
یادونه: کابل ټکی کام هره خپریدونکې لیکنه د لیکوال خپل نظر دی د ادارې توافق ورسره شرط نه دی.
