کابل ټکی کام (جمعه، ۲۸ سلواغه، ۱۴۰۱ل)
د کابل پوليسو د ولسي جرګې د پخوانۍ غړې مُرسل نبي زاده د قتل په اړه تازه جزئیات خپاره کړي دي.
د کابل د پوليسو وياند خالد ځدراڼ وايي، چې د مرسل نبي زاده او محافظ یې (اسمعیل) د مقتولې د بل ساتونکي (مالیار) له لوري وژل شوي دي.
نوموړي په خپل ټويټر اکاونټ ليکلي ، قاتل چې فرار و، د کشفي عملیاتو په پایله کې نیول شوی او په خپل جرم يې اعتراف کړی دی.
د پوليسو وياند زياته کړې، د جرم د ارتکاب عواملو او نورو اړخونو د معلومولو لپاره نورې څېړنې ترې هم روانې دي.
مرسل نبي زاده د ولسي جرګې اوولسمه تقنیني دوره کې د کابل خلکو استازې او د دې جرګې د دفاعي کمېسیون منشۍ وه.
مرسل نبي زاده د تېرې جنورۍ میاشتې پر ۱۴مه د کابل احمد شاه بابا مېنه کې د شپې له مخې خپل کور کې له ساتونکي سره په مرموز ډول په ډزو وژل شوې وه. او هغه مهال رپوټونو کې ویل شوي وو چې ناپېژانده وسله وال د اغلې نبي زاده کور ته ورغلي او نوموړې يې وژلې ده.
