کابل ټکی کام (چهارشنبه، ۳ کب ، ۱۴۰۱ل)
د منهاټن نیویارک قاضي جورج ډینیل د سه شنبې په ورځ وویل چې د سپټمبر د یوولسمې د قربانیانو کورنۍ د تاوان تر سرلیک لاندې د افغانستان د مرکزي بانک له شتمنیو څخه د میلیونونو ډالرو د اخستلو حق نلري.
هغه وویل، له حقوقي اړخه طالبان د افغانستان مشروع حکومت نه شي ګڼل کېدای او د مرکزي بانک شتمنۍ د دوی په واک کې نه دي.
قاضي په خپل حکم کې لیکلي چې وژل شوي کسان د متحده ایالاتو په تاریخ کې د “تر ټولو بدې ترهګرې پیښې” قربانیان وو، مګر د دوی ژوندي پاتې شوي کسان نشي کولی “د افغانستان له مرکزي بانک څخه پیسې واخلي.”
د سپټمبر د یوولسمې د قربانیانو کورنیو هیله درلوده چې په امریکا کې د افغانستان د مرکزي بانک له کنګل شویو پیسو څخه د خسارې په توګه څه باندې درې میلیارده ډالر ترلاسه کړي.
په ياد بريد کې د قربانیانو د کورنیو په حق کې د محکمې د پریکړې احتمال ته په پام، د جو بایډن ادارې په ۱۴۰۰کال کې یو اجرایوي حکم لاسلیک کړ چې د خسارې د ورکولو لپاره یې د 7 ملیارد ډالرو کنګل افغان پيسو څخه 3.5 ملیارد ډالرو تخصیص ته لاره هواره کړه، چې د قربانیانو کورنیو ته به ورکول کېږي.
خو دا دوهم امریکايي قاضي دی چې د کورنۍ د تاوان غوښتنه یې ردوي.
افغان حکومت په بار بار غوښتنه کړې چې ياد ميلياردونه ډالر د افغان اولس حق دې او بېرته بايد په دې سختو شرايطو کې افغانستان ته ورکړل شي.
