کابل ټکی کام (پنجشنبه، ۴ کب ، ۱۴۰۱ل)
د راپورونو له مخې ، د تورخم دروازه د ا،ا،ا مسئولينو له لوري له خلاصېدو وروسته پاکستاني لوري تړلې ده.
د ننګرهار ولايت د رسنيو دفتر، په تازه خبرتيا کې د يادې دروازې د تړلو خبر ورکړی او له هېوادوالو غوښتل شوي چې تر بلې خبرتیا پورې له تګ راتګ څخه ډډه وکړي.
تورخم دروازه درې ورځې مخکې وروسته تر هغې د افغان چارواکو له لوري وتړل شوه، چې په وينا يې پاکستاني لوري ناروغانو ته په اوښتلو، د مهاجرينو او نورو افغانانو هېواد ته په راتګ او نورو اړونده موضوعاتو کې مشکلات جوړ کړي و.
د افغان چارواکو په وينا، پرون د پاکستان د دفاع وزير او د آي اس آی د مشر په ګډون يو پلاوی د خبرو لپاره کابل ته راغلی و او دلته يې له ملا عبدالغني برادر ، د افغانستان دفاع وزير ملامحمد يعقوب مجاهد او نورو چارواکو سره په بېلابېلو مسايلو خبرې کړي او نن بيا د افغانستان له اړخه د يادې دروازې د پرانيستلو خبر ورکړل شو.
