الله تعالی رسول اللهﷺ ته وايي: ای مدثره! ودريږه او ويرول(دعوت) پيل کړه! [سورة مدثر]
الله تعالی دحبيب په نامه دهغه کس ستاينه کړې ده چې دخپل قوم د هلاکت او ګمراهۍ له ویرې څخه په منډه منډه راغی او خپل دعوت يې پيل کړ: «يو سړی دښار له پایه په منډه راغی او خپل قوم ته يې وويل: ای قومه! د رسولانو پيروي وکړئ!»[ سورة يسن]
الله تعالی په قرآنکريم کې هغه کسان ګام په ګام غندلي دي او توبیخي الفاظ یې ورته کارولي دي چې له جهاده به پاتې وو او په کورونو کې به ناست و. له درو تنو صحابه کرامو کعب بن مالک، هلال بن اميه او مراره بن ربيع (رضي الله عنهم) څخه الله تعالی، رسول اللهﷺ او مؤمنان څلویښت ورځې خفه و؛ ځکه پرته له کوم عذر څخه يې ددین لپاره حرکت(جهاد) پریښودل.
ابراهيم علیه السلام خپل زوی اسماعيل علیه السلام ته وايي: زه الله تعالی په يو کار امر کړی یم؟ زوی يې ورته وايي « همغه وکړه چې رب درته امر کړی» پلار يې ورته وايي: ته کومک راکوې؟ زوی يې ورته وويل«زه کومک در کوم» [البخاري] هوکې دا حرکت و!
حرکت دمثبتو نتيجو زيږونکی ده او سکون(پاتې کيدل) شنډ ده، حرکت ددعوتګرو په قاموس کې ژوند ده او سکون مرګ بلل شوی ده، حرکت پيل دی او سکون پای دی.
داسلام په لومړنيو کلونو کې مسلمانان دحرکت په سبب لکه دلمر وړانګې دځمکې په ټولو اطرافو کې خواره واره شو، ښارونه يې فتحه کړو، د بندګانو زړونه يې له کفر او شرک څخه آزاد کړو، توحيد ته يې دعوت پيل کړ، طاغوتانو ته يې شکست ورکړ او خلګ يې د جنت په لور رهي کړو. دوی دحرکت له برکته دژوند په تاريکيو کې روښانه څراغونه وګرځيدل، چې په نتيجه کې يې باطل له لمبو وروسته ايرې کړ او له حرکته وروسته يې ووژل.
امام شافعي (رحمه الله) خپل عشق له حرکت سره تمثيلوي او له سوستي سره خپله کرکه څرګندوي. نوموړی سکون له هغه اوبو سره ورته ګڼي چې له جريان (روانيدو) څخه په دريدو فاسدي وګرځي او خراب بوی وکړي، دی په دې پوره باور لري چې زمری هم کله چې دخپل ښکار لپاره حرکت ونه کړي؛ نو له هلاکت سره مخ ده، دا شان غيشی که له ليندې څخه حرکت ونه کړي نو خپل هدف ته نه رسېږي، لمر که په يوه ځای ودریږي او حرکت ونه کړي نو عرب او عجم به ټول په خفګان کې واچوي.
نن ډير با استعداده کسان دا يوه ناروغي لري چې حرکت نه کوي، خپلې چارې پرمخ نه وړي، ځنډوي يې او په تعميل کې يې زړه نا زړه وي، ډير بیا د تسويف(کار ځنډولو) په رنځ اخته وي.
موږ باید حرکت وکړو او نورو ته حرکت ورکړو، وخت روان ده، بايد موږ هم ورسره روان شو، نړۍ روانه ده بايد موږ هم ورسره روان شو، معاصر جاهلیت او الحاد مخ پر وړاندې روان دی بايد موږ هم پرمختګ وکړو او مخه يې ونيسو، باطل پرستان ناست نه، بلکې روان دي او منډي وهي نو بايد موږ هم له حق څخه ددفاع او باطل پر وړاندې دمبارزې لپاره منډي ووهو او شاته پاتې نه شو.
