کابل ټکی کام (جمعه، ۱۲ کب، ۱۴۰۱ل)
په ډیره خواشینۍ سره مو خبر تر لاسه کړ چې د اخوان المسلمین د نړیوال اسلامي غورځنګ لوړ پوړی مشر ویاند، او نومیالی مجاهد “دکتور کمال الحلبوي” د ۸۴ کلونو په عمر وفات شو.
نوموړي په ۱۹۳۹م کال کې زیږدلی و او په عربي نړۍ کې یو له مشهورو انقلابي شخصیتونو څخه ګڼل کېده او د ځوانۍ په لومړي پړاو کې یې د اخوان المسلمین ګوند غړیتوب ترلاسه کړ او د ژوند په اوږدو کې د مصر د بېلا بېلو جابرو واکمنانو لخوا زنداني، کلونه یې په زندان کې تېر کړل؛ خو خپله لاره یې بدله نه کړه او د ژوند تر پایه د د یاد ګوند د بنسټګر “شهید امام حسن البناء رحمه الله” تګلارې ته ژمن پاتې شو.
ارواښاد “الحلبوي” په خپل ۸۴ کلن مجاهدانه ژوند کې په مصر او نورو هېوادونو کې د سیکولریزم او الحاد پر وړاندې بریالۍ مبارزه وکړه د لسګونو کتابونو او مقالو پر لیکلو سربیره یې په ګڼ شمېر هېوادونو کې لیکچرونه ورکړل او مسلمان ځوانان یې د سیکولریزم، نیشنلیزم او الحاد له زیانونو خبر کړل د ملګرو په خبره یې: د نوموړي د دعوت له امله په زرګونو ځوانانو باطل افکار پرېښودل او د حق لوري ته را واوښتل.
الله تعالی دې پرې ورحمیږي
