کابل ټکی کام (چهارشنبه، د وري ۲، ۱۴۰۲ل)
د لغمان سيمه ييز چارواکي وايي چې د دې ولايت په څو ولسواليو کې د تېرې شپې د زلزلې له امله دوه تنه مړه او ١٦ نور ټپيان شوي دي.
د لغمان د پېښو پر وړاندې د مبارزې رييس خيرمحمد غازي وايي، د زلزلې له امله په مرکز مهترلام او د الينګار، اليشنګ او دولتشاه په ولسواليو کې ٢٢ کورونه ويجاړ شوي دي.
هغه زياته کړه، چې د اليشنګ ولسوالۍ په “ميا صاحب” سيمه کې د يوې ښځې او يوه ماشوم په ګډون دوه تنه چې د همدې کورنۍ غړي وو، وژل شوي او د دې کورنۍ اته نور غړي ټپيان شوي دي.
د هغه په وينا، نور ټپيان د لغمان د نورو ولسواليو اوسېدونکي دي.
د عامې روغتیا وزارت د وروستیو معلوماتو له مخې د دې زلزلې له امله په ټول هېواد کې څلور تنه وژل شوي او نږدې ۷۰ تنه ټپیان شوي دي.
د افغانستان پر وخت د سه شنبې په شپه شاوخوا ۹:۲۰ یوې نسبتاً زورورې زلزلې د کابل په ګډون د هېواد یو شمېر شمالي او شمال ختیځې سیمې ولړزولې.
دا زلزله په پاکستان او هند کې هم احساس شوې ده.
د امریکا د زلزلې مرکز اعلان کړی چې د دغې زلزلې مرکز د افغانستان د بدخشان د جرم ولسوالۍ و، د ریښتر په کچه یې شدت ۶.۵ او ژوروالی یې ۱۸۷ کیلومتره و.
