کابل ټکی کام (جمعه، د وري ۴، ۱۴۰۲ل)
د راپورونو له مخې ، د بلخ ولایت د زارع ولسوالۍ په مربوطاتو کې د سېلابونو له امله شاوخوا ۳۰۰ د استوګنې کورونه ویجاړ شوي او ځايي اوسېدونکو ته ډېر مالي زیانونه اوښتي دي.
د بلخ د امنيې قوماندانۍ وياند محمد اصف وزيري وايي، دغه سېلابونه تېره ورځ (پنجشنبه د سلواغې ۳مه) د دغه ولايت په زارع ولسوالۍ کې راوتلي دي.
د وزيري په وينا، دغو کورونو ته څېرمه شاوخوا درې زره جريبه کرنيزه ځمکه سېلابونو لاندې کړې او د ځايي اوسېدونکو سلګونه څاروي هم له منځه تللي دي.
ځايي اوسېدونکي وايي، چې دغه سېلابونه د زارع ولسوالۍ په “ميرزايي” سيمه کې راوتلي او هغه سيمه کې نږدې زر کورنۍ ژوند کوي.
دغه سرچینې تاییدوي، چې سېلابونو شاوخوا ۳۰۰ د استوګنې کورونه ویجاړ کړي او د دغو کورنیو ډيری غړي لادرکه دي.
