کابل ټکی کام (چهارشنبه، ۱۶ وری، ۱۴۰۲ل)
د اسلامي امارت په مشرۍ افغان سرپرست حکومت په “الاقصی جومات” کي په بې دفاع لمونځ کوونکو د اسرائیلي اشغالګرو ځواکونو ظالمانه برید په کلکو ټکو غندلی دی.
د بهرنيو چارو وزارت په خپره کړې خبرپاڼه کې زياته کړې، چې د راپورونو له مخې، تېره شپه د اسرائیلي اشغالګرو ځواکونو په دې برید کې شاوخوا ۱۰۰ بې ګناه فلسطینیان ټپیان شوي او ۴۰۰ نور د دوی له لوري نیول شوي دي.
سرچينې همدارنګه ويلي، چې د اسرائیلي ځواکونو له لوري په مظلومو فلسطینیانو دغه ډول بشر ضد کړنې او د سپیڅلو اماکنو بې حرمتي له نړیوالو، اسلامي او انساني قوانینو څخه ښکاره سرغړونه، د نړۍ د مسلمانانو احساسات راپارول او ارزښتونو او مقدساتو ته سپکاوی دی.
د ویلو ده، چې اسرائيلي اشغالګرو تېره شپه په الاقصی جومات کې پر فلسطيني مسلمانانو د تراويح د لمانځه پرمهال بريد وکړ او لسګونه کسان يې ټپيان کړل.
