کابل ټکی کام (یکشنبه، ۲۰ وری، ۱۴۰۲ل
د بهرنيو چاور سرپرست وزير د دوحې تړون د ستونزو حل لپاره يو ښه چوکاټ و، خو زياتوي چې په بين الافغاني مذاكراتو کې له مقابل لوري سره اختيارات نه وو، نو ځکه يې پايله ور نه کړه. نوموړي دغه څرګندونې له يوه عربي ټلوېزيون سره په مرکه کې کړې چې د دغه وزارت مرستيال وياند يې يوه برخه پرون خپره کړې ده. د بهرنيو چارو سرپرست وزير ويلي، د دوحې په تړون کې د اسلامي امارت مسئوليتونه هم معلوم وو او د امريکا او د هغوی د متحدينو مسئوليتونه هم. نوموړي وايي د اسلامي امارت مسئوليت دا و، چې د ۱۴ مياشتو په لړ کې به بهرنيو ځواکونو ته د وتلو لار برابروي او پر هغوی به بريدونه نه کوي بل مسئوليت يې دا و، چې د افغانستان خاوره به د چا پر ضد نه کارول کېږي. د هغه په خبره د امريکا په مسئوليتونو کې لومړي مسئوليت دا و، چې په درېيو مياشتو کې به د دوی پنځه زره بنديان آزادوي ،خو د بنديانو خلاصون لس مياشتې وخت واخيست چې بين الافغاني مذاكرات يې هم وځنډول.
