حسان مجاهد
د یرموک په غزا کې یو زړور او پهلوان رومي کافر را وړاندي شو او ويې ويل چې له ماسره کوم مسلمان مقابلې ته چمتو دی؟
یو نامعلوم هلک چې عمر يې تر شل کلنۍ نه و تېر؛ د مسلمانانو مشر ابو عبیده ابن جراح”رض” ته وویل: زه غواړم چې د الله تعالی د يو دښمن په وژلو زړه يخ کړم، د الله تعالی په لاره کې ځان قربان کړم په دغه اميد چې الله تعالی شهادت را په برخه کړي؛ نو ایا ته اجازه راکوې؟
دې الفاظو أبو عبيده “رض” حیران کړ او د مبارزې أجازه يې ورکړه. مبارزې ته د وتلو پر مهال(چې د نوموړي وروستۍ شيبې وي او دشهادت په ابدي سفر روان و) أبو عبيده ته يې وکتل او ورته یې وویل ” ایا رسول ﷺ ته يوه خبره لیږې؟” أبو عبيده په دې خبره دومره وژړل چې ږيره يې لمده شوه، له هغه وروسته يې وويل: رسول الله ﷺ ته زما سلامونه وایه او ورته ووايه چې له تا وروسته موږ هغه څه ترلاسه کړل چې له موږ سره رب تعالی وعده کړې وه!
په مسلمانانو کې نامعلوم، خو الله تعالی ته ښه معلوم هلک د هغه رومي کافر مقابلې ته ور وړاندي شو، هغه يې ووژل، آس او سلاح يې مسلمانانو ته غنيمت راوړو. دوهم ځل بیا ور وړاندي شو او غږ يې کړ: څوک مبارزې ته چمتو دي؟
دوهم کافر ورته را وړاندي شو، هغه يې ووژل، دریم يې ووژل، څلورم يې ووژل، خو د پنځم کافر په راتګ سره د هلک اجل او له رسول الله ﷺ سره دليدنې وخت را نږدې شو، کافر يې غاړه ووهله او په ځمکه را پريوت. سپیڅلی روح يې د شنو مرغانو په سینو کې د جنتونو په لوري پرواز وکړ او رسول الله ﷺ ته يې د أبو عبيده رض پيغام ورسول(انا لله وانا إليه راجعون)
ماځذونه:[مائة من عظماء التاریخ][قصة الإسلام]
