د پاکستان له زندانونو څخه ٥٦ تنه افغان بندیان را خلاص او په دولتي مصارفو خپل هیواد ته را ستانه شول
کابل ټکی کام (يکشنبه، ۱۰ ثور، ۱۴۰۲ل)
د راپورونو له مخې، د پاکستان له زندانونو څخه ٥٦ تنه افغان بندیان را خلاص او په دولتي مصارفو خپل هیواد ته را ستانه شوي دي.
د افغانستان د بهرنیو چارو وزارت وياند حافظ ضيا احمد په خپل رسمي ټويټر اکاونټ د ياد شمېر افغانانو د خلاصون خبر ورکړی زياتوي دغه افغان بنديان د شنبې په ورځ، د ١٤٠٢ هجري شمسي کال د ثور په ٩ مه، اسلام آباد کې د افغانستان سفارت او کراچۍ کې د هېواد جنرل کونسلګرۍ د هلو ځلو په ترڅ کې د سیند ایالت له زندانونو څخه را خلاص او په دولتي مصارفو خپل هیواد ته راستانه شول.
د ښاغلي ضيا احمد په وينا، تر دې مخکې هم پاکستان کې د افغان سفارت په هڅو سلګونه افغانان د هغه هېواد له بېلابېلو زندانونو آزاد شوي چې په خبره يې تر دې مهاله يې شمېر تر ٢٢٧٦ تنو پورې رسېږي او خپل هېواد ته راستانه شوي دي.
