عبد الجبار وحدت
دا ډېره اړینه ده چې ځوان نسل باید فکري خط ولري او په ټول منلي او حق فکر باندې ثبات و استقامت ولري، زما دا لیکنه ممکن ځینو ته خسته کوونکې تمامه شي، ځینې یې بې مانا وبولي، مګر په کل کې زما ستراتیژیکه موخه دا ده چې مومن ځوان ته بویه چې مشخص فکري خط او ثبات ولري، زما نهایي موخه یو داسې نقطې ته نغوته کول دي، چې ممکن ځوانان ورته متوجه نه وي ، یا یې مهمه و نه بولي ، یا دوی داسې فکر وکړي چې راځه د لس رقمه نظامونو سره لس رقمه رنګونه بدلوه ، ثبات د مومن ځوان یوه لویه ځانګړنه ده ،په افغانستان کې هر ګوند له نیکه مرغه چې اوس ټول په بشپړ ډول منحل شوې دي ، خپل د غړو ارقام لوړ ښیي، وجه دا ده چې یو ځوان هر ګوند ته سر ورښکاره کړی دی ، د هغه غړیتوب یې تر لاسه کړی دی او لکه ملنګ د هر چا دروازه یې ټکولې ده ، فکري ثبات تر هغه وخته مهم دی ، تر څو چې په خپله تګلاره اګاه شوې چې په غلطه یم ،بیا ترې واوړه، هیڅ فرق نه کوي ، په اوس کې د اکثریت ځوان نسل یوازې مخونه یا شکلونه تغییر شوي دي او هره ورځ یې کوښښ دا وي چې بیا د یو تغییر په نتیجه کې نننی شکل هم بدل کړي، دا چې دوی ولې داسې کوي ؟ دلته یو لوی روحاني بحث ته اړتیا ده ، معمولا د هر جسم ښکلا په ډېرو نماوو یا رنګ رنګ ښکاره کېدلو کې ده ، مګر د مومن ځوان ښکلا په پر ځای ثبات کې ده ،زموږ د قام ځوانان که په خپلو څلورو فکټورونو ( استاد،چاپیریال، کتاب او سیاسي رهبر) باندې له سره فکر وکړي ، هیڅکله به خپل رنګ بې وخته او بې موقع بدل نه کړي ،پاکه ربه ! په حقه لار ثبات را !
