کابل ټکی کام (یکشنبه، ۸ زمری، ۱۴۰۲ل)
امریکایي ورځپاڼې وال سټرېټ ژورنال اعلان کړی، چې ټاکل شوې ریاض د کیېف او مسکو ترمنځ د سولې خبرو کوربه توب وکړي.د ورځپاڼې د معلوماتو له مخې دغې ناستې ته د نړۍ د ۳۰ هېوادونو لوړ پوړي چارواکي وربلل شوي او د راروانې اګسټ میاشتې پر ۵مه او ۶مه پلان شوې ده. وال سټرېټ ژورنال دغه راز لیکلي، چې دغه ناسته د روسیې له حضور پرته رابلل شوې او ټاکل شوې د اندونیزيا، مکسیکو، اروپایي ټولنې او ګڼ شمېر نورو هېوادونو استازي په کې ګډون وکړي. دغې ورځپاڼې دغه خبر په داسې مهال خپور کړی، چې تازه د روسیې ولسمشر ولادیمیر پوتین د افریقایي هېوادونو له مشرانو سره د غونډې په درشل کې وویل، چې هېواد یې غواړي د اوکراین د جګړې اړوند ستونزې د خبرو اترو له لارې حل شي، خو امریکا او ځینې نور لویدیځ هېوادونه نه غواړي دغه خبرې بریالۍ شي.