سرمقاله
امريکايي چارواکي دې په افغانستان کې د تخريب پرځای د ترميم لاره غوره کړي او افغانان دې پرېږدي، چې خپل برخليک پخپله وټاکي. هغوی دې بيا هغه نسخه نه کاروي، چې دافغان مومن او مېړني ملت قهر او غوسه راپاروي. د تېرو څه دپاسه څلورو لسيزو جګړې او په هغو کې د ميليونونو افغانانو شهادت او مرګ ژوبله په دې خاطر وه، چې په افغانستان کې يو سپېڅلی اسلامي نظام حاکم شي، چې دا زموږ د دوه نيم ميليونو شهيدانو او د ۹۹،۹۹فيصده وګړو ارمان او هيله وه او په همدې موخه يې خپل کورونه، ځانونه او د وجود خواږه غړي د الله جل جلاله په لاره کې نذرانه کړل او ۴۳ کاله يې مسلسل د شرقي او غربي اشغالګرو په وړاندې خپلې سينې سپر او د هغوی دټوپکو زهري او ګرمې مرمۍ يې د خپل وجود په غوښو او وينو يخې کړې او بالاخره يې د افغان مجاهدينو د بې دريغه او لامثاله قربانيو په پايله کې شرقي ښکرور او غربي فرعونيان له خپلې سپېڅلې خاورې تېښتې ته اړ کړل او په افغانستان کې اسلامي نظام، چې د افغان مؤمن او باتور ملت ارمان و، حاکم کړ، چې په مقابل کې يې بيا غرب او په غرب پورې تړلو هيوادونو پراخ رسنيز تبليغات پيل کړي او غواړي چې په افغانستان کې د ملت او حکومت ترمنځ د بې اتفاقۍ زهري تخم وپاشي او له دې لارې خپلې شومې او ناولې موخې ترلاسه کړي. د دوی دا ډول مذبوحانه هلې ځلې به هېڅ ښه پايله و نلري. موږ پر امريکا غږ کوو، چې د افغانانو پرضد له دغه ډول کړنو لاس واخلي او د دغه رنګ تخريبي اعمالو د ترسره کولو پر ځای دې، چې له ګټو څخه يې زيان ډېر دی، له حاکم خپلواک نظام سره د خبرو او تعامل لاره غوره کړي. د افغانانو په وړانديې هر ډول ناوړه سياستونه او اعمال به افغانان نور هم د غرب او غربي انډيوالانو په مقابل کې سره منظم او يوموټي کړي او د دوی لپاره به هېڅ مثبته پايله ونلري او که افغانان د امريکا هغه فرمايشات، چې په افغانستان کې يې په لټه کې ديه، ومني، نو بيا دافغانانو دا شل کلنه اوږده مجاهده او مبارزه دڅه لپاره او ددوه نيم ميليونو شهيدانو دقربانۍ موخه څه وه؟ موږ له امريکا او انډيوالانو يې په کلکه غوښتنه کوو، چې تېرې ترخې تجربې بيا تکرار نه کړي او افغانان پرېږدي، چې د خپل ځورېدلي ملت په خپله د عدالت په رڼا کې د اسلامي نظام تر چتر لاندې وټاکي.
