کابل ټکی کام (یکشنبه، ۱۹ وږی، ۱۴۰۲ل)
د کورنيو چارو وزیر خليفه سراج الدين حقاني ولايتونوته د خپلو سفرونو په دوام د ميدان وردګو ولایت ته د خپل سفر په ترڅ کې د دې ولايت له سيمه ييزو چارواکو سره په کتنه کې وويل، چې موږ د اسلامي او ملي ارزښتو پر بنسټ له نړۍ سره د اړيکو ساتلو ته چمتو يو.
د ميدان وردګو ولايت رسنيز دفتر د سنبلې په ۱۸مه په يوه راپور کې ليکلي، چې د کورنيو چارو وزیر دې ولايت ته د يو سفر په ترڅ کې د دې ولايت له سيمه ييزو چارواکو، ديني عالمانو، مشرانو او ځوانانو سره وکتل.
ويل کېږي، چې په دې کتنه کې قومي مشر شېخ صبغت الله د کورنيو چارو وزیر سره د ميدان وردګو ولايت د اوسېدونکو پر ستونزو خبرې وکړې او دغه ولايت ته يې د مرکزي دولت د لوړ پوړو چارواکو د پاملرنې غوښتنه وکړه.
په همدې حال کې د کوچيانو د کمېسيون مشر جوادي بلخابي په دې کتنه کې زياته کړه: د دې ولايت د کوچيانو او اوسېدونکو ترمنځ ټولې ستونزې د شرعي او اسلامي عدالت له لارې حل شوې دي.
له بلې خوا په دې کتنه کې د کورنيو چارو وزیر سراج الدين حقاني وويل: د ميدان وردګو ولايت ولسونو تل په صداقت او لوړ باور سره جهادي برياوې ترلاسه کړي او د تاريخ په اوږدو کې د دغه ولايت ولسونه تل له ننګونو سره مخ شوي دي.
ښاغلي حقاني زياته کړه: (( د نړيوالو قوانينو له مخې د اسلامي او ملي اصولو پر بنسټ له نړۍ سره د اړيکو لپاره زموږ دروازې خلاصې دي، خو د هيواد پرمختګ زموږ مسئوليت دی او افغانان به يې له کومې تمې پرته په ګډه ترسره کړي.))
بايد وويل شي، چې په دې وروستيو کې د کورنيو چارو وزیر “الحاج خلیفه سراج الدین حقاني” د هيواد بېلابېلو ولايتونو ته سفرونه کړي دي چې دا لړۍ لا هم روانه ده.
