کابل ټکی کام (شنبه، ۲۵ وږی، ۱۴۰۲ل)
د ځینو عربي رسنیو د راپورونو له مخې د سوریې د حما ولایت په پوځي مرکزونو د اسرائیلي نیواکګرو د وړمې ورځې په هوایي بریدونو کې د وژل شویو سوریایي پوځیانو شمېر ۷۰ تنو ته رسیدلی دی.
دا په داسې حال کې ده چې، د تېرې چهارشنبې په ورځ د سوریې رسمي رسنیو راپور ورکړ چې د مدیترانې بحیرې ته څیرمه د طرطوس په ښار کې د اسرائیلو په هوایي بریدونو کې دوه سوريایي سرتیري وژل شوي او لسګونه نور ټپیان شوي دي.
په ورته مهال د سوریې د حکومت یوې مخالفې سرچینې عربي ۲۱ خبري آژانس ته ویلي، چې د اسرائیلو وروستي بریدونه د حمص ولایت په جنوب ختیځ کې د الشیرات پوځي هوايي ډګر هم په نښه کړی او د حما په جنوب کې یې یوه پوځي اډه هم په نښه کړې ده.
دا اډه په سوریه کې یوه له مهمو پوځي هوايي اډو څخه ده ګڼل کېږي.
د اسرائیلو پوځي کارپوهان ادعا کوي چې په دې بریدونو کې په سوریه کې د ایران له ملاتړه د برخمنې حزب الله ډلې ځینې مهم مرکزونه هم نښه شوي دي.
د ویلو ده چې اسراییلي نیواکګرو په تیرو څو کلونو کې په سوریه کې د یاد هیواد د پوځي مرکزونو ترڅنګ په دغه هیواد کې د میشتو ایران پلوو ډلو او د فلسطین د حماس او اسلامي جهاد ډلو په پوځي مرکزونو سلګونه ځله بریدونه کړي چې په پایله کې یې زرګونو کسانو ته مرګ ژوبله اوښتې ده.
