کابل ټکی کام (دوشنبه، ۲۷ وږی، ۱۴۰۲ل)
لیبیا کې د تېرې یکشنبې شپې د سېلابونو له امله تر دې مهاله شاوخوا ۱۶ زره کسان مړه شوي او تر شلو زرو ډېر نور لاهم نادرکه دي او د ژغورنې او جسدونو د راوېستلو عملیات لا هم روان دي.
لیبیا کې دغه مرګونې پېښه وروسته ترهغې رامنځته شوه، چې په ختیځ درنه ښار کې د ډانیال په نوم ځواکمن مدیترانې توپان د اوبو دوه بندونه مات کړل.
د معلوماتو له مخې؛ په درنه ښار کې نږدې سل زره کسان اوسېدل چې له پېښې ژوندي یې اوس مهال له سختو ستونزو سره مخ دي.
لیبیایي چارواکو ویلي، په ټول هېواد کې یې د وروستیو اورښتونو، توپان او سېلابونو له امله یو میلیون کسان زیانمن شوي، چې بېړنیو مرستو ته اړتیا لري.
د ویلو ده چې ترکیې، مصر، ملګرو ملتونو او ځینو نورو نړیوالو مرستندویو ادارو زیانمنو شویو سره د مرستې لپاره وردانګلي خو د پېښې لویوالي ته په کتو د لیبیا د ملي یوالي حکومت د لا ډېرې مرستې غوښتنه کړې ده.
