لیکنه ـ ابو عبدالله حماد
دا چې په نړۍ کې د ایمان او مادیت معرکه روانه ده نو لازمه مې وګڼله چې پر ماده پرستي څو کرښې ولیکم تر څو ځوان نسل پر دې وپوهیږي چې ماده پرستي یا مادیت څه ته وایي او ضررونه یې کوم دي.
د مادیت یا ماده پرستي معناګانې:
۱ ـ دونیوي یا مادي.
۲ ـ غیر روحاني معنا هغه څوک چې دین پال او متدین نه وي.
۳ ـ هغه څوک چې عبادت کوونکی نه وي.
ماده پرستي: هغه ایډیا او نظریه ده چې وایي اخلاق او روزنه باید په دیني اصولو نه وي ولاړ.
د ماده پرستۍ تعریف بریتانوي دایرة المعارف داسې کړی دی: ماده پالنه هغه اجتماعي حرکت دی چې غواړي د خلکو توجه له آخرت څخه واړوي او ټوله توجه یې د دنیا خواته جلب او جذب کړي.
د ماده پرستۍ زیږنده آتیزم(الحاد) دی.
آتیزم(الحاد): د الله تعالی له وجود څخه انکار ته آتیزم وایي.
آتیست(ملحد) هغه چاته وایي چې له الله تعالی څخه منکر وي.
په بریتانوي دایرة المعارف کې یې له ماده پرستۍ څخه را ولاړ شوی کفر(الحاد) په دوه ډولونو باندې ویشلی دی.
۱ ـ نظري الحاد ۲ ـ عملي الحاد
بریتانوي دایرة المعارف دا هم لیکلي چې ماده پرستي د عملي الحاد یو ډول ګڼل کیږي.
د ماده پرستۍ په اړه لاندې دوه ستر پیغامونه باید د تل لپاره زموږ په ذهن کې موجود وي.
۱ ـ ماده پرستي کفري تیوري او نظریه ده چې دنیا کې د نښلېدو له کبله له دین څخه مخ اړول دی. له همدې کبله ماده پرستي هغه نظریه ده چې دنیا او ټول دونیوي کارونه او لاس ته راوړنې په ټولو سیاسي، اقتصادي، اجتماعي، اخلاقي، نظامي او قانوني اموراتو کې بیدون له دین څخه همدغه ماده پالنه اصل او اساس ګڼي.
۲ ـ ماده پرستي له علم او پوهې سره هیڅ تړاو نه لري البته ددې نظریې خوښوونکو او پر مخ وړونکو د خلکو د غولولو لپاره داسې ښکاره کړې چې ګویا له ماده پرستۍ څخه یې تجربوي علومو ته توجه دی. خو په حقیقت کې داسې نه دی او د دوي اصلي هدف آتیزم(الحاد) دی.
