کابل ټکی کام (شنبه، ۱۵ تله، ۱۴۰۲ل)
له غزې تړانګې ورکړل شوي راپورونه وایي، چې د حماس اسلامي حرکت پوځي څانګې “القسام” لېوا د اسرائیلو په دریو ښارونو پراخ عملیات پیل کړي او تر دې دمه یې۵۰۰۰ توغندي په هغو سیمو ویشتلي چې یهودیان پکې مېشت دي.
د عربي او لوېدیځو رسنیو د راپورونو له مخې د حماس پوځي څانګې د شنبې په سهار د اسرائیلو پر ضد د پراخو عملیاتو په ترڅ کې پر اسرائیلو ۵۰۰۰ توغندي توغولي دي چې په پایله کې یې تر دې دمه لسو کسانو ته مرګ ژوبله اوښتې ده.
د حماس د پوځي څانګې “القسام” قوماندان “محمد الضیف ابو خالد” د الاقصی په نوم د عملیاتو د پیل اعلان کړی او په خبره یې چې د نن سهار راهیسې یې پر اسرائیلو پنځه زره توغندي توغولي دي.
له بلې خوا د اسرائیلو د دفاع وزارت ویلي دي چې له غزې څخه د حماس غورځنګ وسله وال د اسرائیلو خاورې ته داخل شوي دي او دا مهال د اسرائیلو ترکنترول لاندې په ۲۲ سیمو کې خونړۍ نښتې روانې دي
په ورته مهال په ټولنیزو رسنیو کې داسې انځورونه او ویډیوګانې لاس په لاس کېږي چې پکې فلسطیني مجاهدین له اشغالګرو صهیونستانو په نیول شویو ټانکونو سپاره د پرمختګ په حال کې لیدل کېږي.
د یادولو وړ ده چې اسراییلو په ۲۰۰۷م کال کې د حماس لخوا د غزې د تړانګې له نیولو وروسته دغه ګڼ میشتی ښار محاصره کړی؛ خو دا لومړی ځل دی چې حماس یې پر وړاندې په دومره ستره کچه د عملیاتو پیلولو خبر ورکوي.
