کابل ټکی کام (پنجشنبه، ۱۳ تله، ۱۴۰۲ل)
په داسې حال کې چې د افغان حکومت، ملګرو ملتونو او د بشري حقونو د نورو نړیوالو ادارو د بیا بیا غوښتنو سره سره په پاکستان کې د امنیتي ځواکونو له لوري د افغان کډوالو نیول او ځورول دوام لري د اسلامي امارت په مشرۍ د افغان چارسمبالي حکومت د دفاع وزیر یې پر وړاندې توند غبرګون ښودلی او په خپلو تازه څرګندونو کې یې ویلي، چې له افغان کډوالو سره د کوربه هیواد له لوري روان وحشت او بربریت د زغملو وړ نه دی او په هېڅ ډول نشي توجیه کېدای.
نوموړي چې نن یې د کورنیو چارو په وزارت کې د ملي پولیسو یوې فراغت غونډې ته خبرې کولی وویل: له افغان کډوالو سره د پاکستان له لوري روان وحشت او بربریت د زغملو وړ نه دی، دا ډېر ستر ظلم دی، وحشت دی او په هېڅ ډول نشې توجیه کېدای.موږ پر نړیوالو، ملګرو ملتونو او همدارنګه د پاکستان پر سیاسیونو او ولس غږ کوو، چې د دې وحشت او بربریت مخه دې ونیسي.
نوموړي دغه راز په پاکستان کې له مېشتو افغان شتمنو او تجارانو غوښتنه کړې چې خپلې هغه شتمنۍ چې پاکستان ورباندي خپل اقتصاد رغولی افغانستان ته را انتقال کړي ترڅو د هغوی اقتصاد ته ضربه ورسیږي.
د ویلو ده چې دا لوړ پوړی افغان چارواکی وروسته له هغه په پاکستان توندې نیوکې کوي، چې په دې وروستیو کې د پاکستان کې چارسمبالي حکومت د افغان کډوالو د ایستلو پرېکړه وکړه او ورسره سم د کډوالو پر وړاندې د امنیتي ځواکونو عملیات پیل شول، چې د راپورونو له مخې تر دې دمه د ښځو او ماشومانو په ګډون ۱۰۰۰ تنه ګډوال نیول شوي چې د ځینو نیول شویو کسانو د وژل راپورونه هم ورکړل شوي دي.
