کابل ټکی کام (شنبه، ۲۲ تله، ۱۴۰۲ل)
له غزې وروستي راپورونه وایي، چې اسراییلي اشغالګرو غوښتل چې نن سهار وختي پر غزې تړانګې ځمکنی یرغل وکړي؛ خو د حماس مجاهدینو له کلک مقاومت سره مخ شوي چې په پایله کې یې لسګونه نیواکګر صهیونیستي پوځیان وژل شوي دي.
په ورته مهال اسراییلي رسنیو خبر ورکړی، چې یوه جنګي الوتکه چې غزې ته یې پوځیا لیږدول د حماس جنګیالیو لخوا په توغندي ویشتل شوی، چې پکې سپاره ټول سرتیري وژل شوي. که څه هم اسراییلي رسنیو د وژل شویو پوځیانو کره شمېره نه ده په ډاګه کړې؛ خو حماس ته نیږدې سرچینې وایي، چې د الوتکې پاتې شوني یې په کنترول کې دي او تر پنځوسو پورې پوځیان پکې وژل شوي دي.
د یو بل خبر له مخې د ترکیې یوه پوځي الوتکه چې غزې ته یې امدادي توکي لیږدول په “رفعه” ښار کې نسکوره شوې ده. ترکي رسنیو تور لګولی، چې اسراییلي پوځیانو ویشتلی ده.
په ورته مهال د ایران د بهرنیو چارو وزیر لیبنان ته تللی او هلته یې د حزب الله له مشر “حسن نصرالله” سره په کتنه کې ویلي، چې د غزې او اسراییلو روانه جګړه به یوازې تر غزې محدوده پاتې نه شي بلکې ټول مینځني ختیځ ته به ورسیږي. حسن نصرالله بیا ژمنه کړې چې وسله وال یې د غزې دفاع ته ژمن دي او په تیرو څو ورځو کې سلګونه توغندي د اسراییلو تر کنترول لاندې سیمو باندې ویشتلي دي.
