کابل ټکی کام (دوشنبه، ۳۱ تله، ۱۴۰۲ل)
د حماس اسلامي غورځنګ پوځي څانګې “القسام لېوا” خبر ورکړی، چې وسله والو یې غزې تړانګې ته د اسراییلي اشغالګرو پوځیانو د ننوتلو هڅه یوځل بیا ناکامه کړې او د غزې په ختیځ د “خان یونس” ښار په څنډو کې دوه اسراییلي ټانکونه ویشتلي چې په پایله کې یې 16 صهیونستان وژل شوي او لسګونه نور ټپیان دي.
د اسرائیلي پوځ ویاند “دانیال هجري” بیا خبر ورکړی، چې غزې تړانګې ته د ننوتلو پر مهال یې ځواکونو ته مرګ ژوبله اوښتې خو د کره شمېرې په هکله یې څه نه دي ویلي.
د صهیونیستي پوځ ویاند زیاته کړې ده چې، د اسرائيلو پوځي چارواکو له خپلو مصري چارواکو سره تماس نيولی او د مصري پوځ پر يوه پوسته يې د توغندي د لګیدلو له امله بښنه غوښتې ده.
په همدې اړه د اسرائیلو پوځي رادیو اعلان کړی چې له غزې څخه د کسوفیم ښارګوټی ته څیرمه د ټانک ضد توغندی په برید کې د پوځ څو تنه عسکر ټپیان شوی دی.
د اسرایلو پوځ په ډاګه کړې، چې د اسرایلو پوځي وسایط چې د کسوفیم په شاوخوا کې پرې برید وشو غزې تړانګې ته یې د ننوتلو هڅه کوله.
تر دې مخکې د «العربیه» خبریال راپور ورکړی و، چې غزې ته نژدې د کسوفیم ښار په شاوخوا کې د القسام مجاهدیو او صهیونیستي پوځ ترمنځ خونړۍ نښتې روانې دي.
