کابل ټکی کام (سه شنبه، ۲ لړم، ۱۴۰۲ل)
د اسراییلي اشغالګر پوځ ویاند خبر ورکړی، چې د غزې په تړانګه کې یې د نیول شویو پوځیانو د خلاصولو په موخه عملیات کړي؛ خو د حماس وسله والو له کمین سره مخ شوي او بېرته ناکامه راستانه شوي دي.
د اسراییلو د پوځ ویاند “دانیل هجري” نن په تل ابیب کې یوې خبري غونډه کې د خبرو پر مهال ویلي، چې د دوی ځواکونه د نویو عملیاتو په چمتوالي بوخت دي؛ خو ښایي دا چمتوالی به څو اوونۍ او یا څو میاشتې وخت ونیسي.
د نوموړي په خبره چې په تېرو څو ورځو کې یې د “حماس” او حزب الله د غونډو په ځایونو باندې څو ځله درنې بمبارۍ کړې دي؛ خو بهرنۍ رسنۍ بیا د نوموړي خبره ردوي او ادعا کوي، چې د اسراییلو په هوایي بریدونو کې ولسي وګړو ته مرګ ژوبله اوښتې ده.
که څه هم د اسراییلو د پوځ ویاند ویلي، چې تر اوسه یې د غزې تړانګې په اړوندو سیمو کې له حماس او نورو فلسطیني ډلو سره په جګړه کې ۳۰۸ اسرائیلي پوځیان وژل شوي او ۲۲۲ تنه نور د فلسطنیانو لخوا نیول شوي دي. خو نړیوالې رسنۍ بیا خبر ورکوي، چې د اسراییلي نظامیانو مرګ ژوبله له هغه څو برابره ډېره ده، چې دوی یې مني.
دویلو ده چې د حماس اسلامي غورځنګ د سیاسي څانګې مرستیال مشر “خالد مشعل” په خپله وروستی مرکه کې که څه هم له دوی سره د بندي اسراییلي پوځیانو د کره شمېرې له ښودلو ډه ډه کړې وه؛ خو ټینګار یې کړی و، چې سلګونه پوځیان یوازې حماس او نور یې له نورو فلسطیني ډلو سره بندیان دي چې په خوندي سیمو کې ساتل کیږي.
