کابل ټکی کام (یکشنبه، ۲۱ لړم، ۱۴۰۲ل)
د ترکيې ولسمشر رجب طيب اردوغان د سعودي عربستان په پلازمېنه رياض کې د اسلامي او عربي هيوادونو د مشرانو په غونډه کې د اسرائيلو له لوري غزه کې د ملکيانو وژلو په اړه د لوېديځو هيوادونو پر چوپتيا سخته نيوکه کړې ده.نوموړي غزه کې د روانې جګړې په اړه ويلي، چې لوېديځ هيوادونه تل د بشري حقونو او آزادۍ نارې وهي، خو په غزه کې د اسرائيلو له لوري د ملکيانو وژلو په اړه چوپ دي، چې دا کړنه يې د شرم وړ ده. ښاغلي اردوغان غزه کې پر ملکيانو بريد او د روغتونونو، تعليمي مرکزونو او د بېځايه شويو پر کمپونه بمبار د نړۍ په تاريخ کې بې مخينې وحشت او بربريت ګڼلی دی.د ترکيې ولسمشر اسرائيل د غرب نامشروع اولاد بللي او ټينګار يې کړی، چې اسرائيلي دولت بايد په دې جګړه کې غزې تړانګې ته اوښتې زيانونه جبران کړي.د رجب طيب اردوغان په وينا؛ تر څو چې د فلسطين مسئله نه وي حل شوې، سيمه کې له اسرائيلو سره د اړيکو عادي کول بېپايلې دي.ښاغلي اردوغان د خپلو خبرو په پای کې ملګرو ملتونو او لاهه نړيواله محکمه کې د اسرائيلي جنايتونو د څېړلو غوښتنه کړې ده.
